—        Гьар экуьнахъ фу недалди вилик са стаканда авай кузвай яд куьлуь-куьлуь хупIар­ ийиз хъвайитIа, хук хъсандиз михьи же­да, бедендин сагъламвилизни екез хийир гу­да.

—        Беденда дакIун (опухоль) авайла, келемдин дувулрикай менфят къачуда. Хуьрекдин са тIуруна авай  (таза ва я кьурай) келемдин дувулрал 0,5 литр ргазвай яд илична, 8-10 сятда кIевирна тада. Ахпа ам куьзна, йикъа пуд-кьуд сеферда фу недалди вилик 1,4 стаканда авайди ишлемишда. Азаррин вилик пад кьун патал келемдин дувулрин настойка цIуд юкъуз ишлемишун бес жеда.

—        Зулуз ва хъуьтIуьз бязи инсанрик ме­кьивилелай яргъал чIугур уьгьуьяр акатда. Са­гъарун патал ихьтин дармандикай менфят къачуз жеда. Ксудалди вилик са стакан чими некIе­диз вад стIал скипидар яна хъвада. Экуьнахъ уьгьуь­дин гелни амукьдач.

—        Хуьрек тIуьрдалай гуьгъуьниз хуквада са гьихьтин ятIани къулайсузвал гьисс ийидайла, йикъа пуд сеферда 1/4 чайдин тIуруна авай регъвенвай дарчинар (корица) чими цихъ галаз ишлемишун меслят къалурзава.

—        Дамарра ивидин гьерекат гагь виниз, гагь агъуз жедайла, 40 твар михекрал 4 стаканда авай яд илична, зайиф цIал эцигна, яд кьве сеферда  тIимил жедалди ргада. Ахпа ам къайила, шуьшедин бутылкадиз цана, холодильникда хуьда. Йикъа пуд сеферда хуьрекдин са тIуруна авайди ишлемишда.

—        Пуд гьафтедин вахтунда гьар юкъуз ­хуьрекдин са тIуруна авай балугъдин чIем ишлемишайтIа, жалгъайра авай купулар гьамишалугъ квахьда.

—        Верчериз гузвай тварцик са тIимил балугъдин чIем кутуртIа, абуру хазвай какайрихъ дава жедай дармандин эсер же­да. Ихьтин какайри ивидин гьерекат агъуз  авудда, мекьивилелай арадал къвезвай азаррикай хуьда ва гьакIни рак ва инфаркт азаррин вилик пад кьада.

—        Юкьва,  далуда, юрфара тIал авайла, анрал верхи тарцин (береза) пешер эцигна кутIунайтIа, тIал фад секин жеда.

—        Эгер яргъалди яшамиш жез кIан­за­ватIа, тIимил тIуьн лазим я. Алимри субутзавайвал, незвай шейэрин калорияр 30-40 процентдин тIимил хьайитIа, ратари­ хъсан кIвалахда ва уьмуьрни яргъи жеда.

—        Атеросклероздик азарлу хьанвай яшлу инсанриз серкин къаришма хийирлу я. Ам икI гьазурда: михьи авунвай са кьил серг ва са лимон ракьай яна, кIвалин температурадин са литр яд илична, 2 суткада агалнавай къапуна тада. Ахпа йикъа пуд сеферда фу недалди вилик хуьрекдин са тIуруна авайди ишлемишда. Са вацралай куьне регьят хьанвайди гьиссда.

—        КIвалах гзаф авурла, нервияр къайдадикай  хкатнавайла, йифиз ахвар тавурла бязи инсанриз азаб гуда.

Йифиз ахвар хъсан атун патал лимондин са пад чкаларни аламаз куьлуь авуна, 1/2 стаканда авай ргазвай яд илична, са шумуд декьикьада тада. Ахпа апельсиндикай са стакандин кьатIа авай миже хкудна, лимон квай циз яда ва мадни аниз чайдин са тIуруна авай лацу чехирни алава хъийида. И дадлу настойка гьар нянихъ ксудалди вилик 1/2 стаканда авайди хъвада. Рецепт лап нетижалуди я — гьасятда ах­варал фида. И настойкадиз шекер ве­гьейтIа, ам мадни дадлу жеда.

—        Кьулан тарцин грыжа авайла, ксудалди вилик кьулан тарцин кIарабривай пихтадин ягълу гуьцIда. Ахпа а чкайрал виртIедик какадарнавай мелгьем (мумиё) эцигда.

—        Кьилин мефтIедин дамарра ивидин гьерекат гзаф хьанавайла, йикъа пуд сеферда хуьрекдин са тIуруна авай чIух­лумпIрин чайдик чайдин са тIуруна авай вирт хуькуьрна хъвада.

—        Бедендал хьанвай жуьреба-жуьре хирериз регъвенвай къавгьве (кофе) кIвахайтIа, хирер фад сагъ жеда.

—        Вилер яру хьана квал акатнавайла, хуьрекдин 2-3 тIуруна авай инжийрал (мокрица) са стакан ргазвай яд илична, са сятда тада, ахпа адал вилер чуьхуьда.

—        Чинал ва я кIвачел мубарак (рожистое волнение) акьалтнавайла, хирез зеленка яда ва къерехривай йод гуьцIда.

Гьазурайди — Надият Велиева