15-октябрдиз Докъузпара райондин администрациядин заседанийрин залда райондин кьил Абдурагьим Алискерова АТК-дин гегьенш заседание кьиле тухвана.
Ана райондин прокурор М.Назирова, Россиядин ФСБ-дин Ахцегьа авай погранкъуллугъдин векилди, райондин кьилин заместителри, образованидин идарайрин руководителри, хуьрерин кьилери, райондин идарайринни тешкилатрин жавабдар къуллугъчийри иштиракна.
Заседанидал образованидин идараяр терроризмдикайни цlаяр кьунин дуьшуьшрикай хуьниз талукь яз райондин АТК-ди 2018-йисан 22-июлдиз кьабулай къарар кьилиз акъудунин ва райондин сергьятра терроризмдиз аксивалунин жигьетдай комплексдин план тамамарунин месэлаяр веревирдна.
Заседанидин кьилин месэлайриз талукь яз хатасузвилин рекьяй райондин кьилин заместитель Къазихан Мегьединова ихтилатна. Ада вичин докладда къейд авурвал, райондин идарайрин са бязи руководителри кьилиз акъудна кlани крариз хъсандиз фикир гузвач. Малум хьайивал, ахтармишунрин нетижада, терроризмдиз ва экстремизмдиз акси серенжемар кьилиз акъудунин карда образованидин идарайрин арада М.Расулован тlварунихъ галай Цlийикаракуьре хуьруьн юкьван мектебда кьиле тухузвай кlвалах разивилин къимет гуз жедайди яз гьисабнава. Къ. Мегьединова и мектебда образованидин идарайрин руководителар патал терроризмдизни экстремизмдиз аксивалунин кlвалахар тешкилунин рекьяй семинарар кьиле тухун теклифна. Ихьтин семинарар хуьрерин кьилеризни герекзавайди къейдна.
Образованидин объектар терроризмдикай хуьнин рекьяй тухванвай кlвалахрин гьакъиндай райондин УО-дин пешекар Осман Османова доклад авуна.
Райондин прокурор М.Назировани и хиляй яз тухузвай кlвалахрин важиблувал къейдна. Терроризмдинни экстремизмдин вилик пад атlунин серенжемрик прокуратурадини къуьн кутадайди лагьана.
Эхирдай райондин кьил Абдурагьим Алискерова хатасузвилин рекьяй райондин кьилин заместитель Къазихан Мегьединова гайи теклифрин тереф хуьн чарасуз тирди лагьана. Ада ихтилатайвал, образованидин вири идарайра гуьзчивилин камераяр кардик кутунин месэлаяр саки гьялна куьтягьзава. Райондин Кьили и месэлайриз гьакъикъидаказ фикир гун важиблу тирди ва абур вичин гуьзчивилик квайди лагьана.
«Лезги газет»
