Вичин баркаллу краралди чи халкь машгьур авур кьегьал хва, Социализмдин Зегьметдин Игит  Темирханов  Гьажимурад  Алимурадович  сагъ яз къе чи арада амайтIа, алай йисуз чна ам дидедиз хьайидалай инихъ 100 йис тамам хьун шад гьалара къейддай. Ам­ма инсафсуз ажалди адаз вичин багърийрихъ, ярар-дустарихъ галаз санал  80 йисан юбилейни къейддай мумкинвал ганач.

Амма, мисалда лугьудайвал, игитар рекьидайди туш: абурун тIварар ва крар гьамиша халкьдин мецел жеда. ТIвар халкьдин мецел аламай кьван инсандин руьгьни сагъ яз амукьда лугьуда.

Вичин ери- бине Цмуррин хуьряй тир Темирханов Гьажимурад 1918-йисуз нафт акъуддай буругъчидин хизанда ди­де­диз хьана. ЦIемуьжуьд йис тамам хьайила, Гьажимурад буругъар ядай “Сталиннефть” трестдин “Ширваннефть” управленида фялевиле кIвалахал акъвазна. Алакьунар, бажарагъ авай жегьил­ инанмишвилелди виликди фена. КIва­лах­за­вай кьве йисан вахтунда ам фяле­вилелай буругъ эгъуьндайдан (бурильщикдин) куьмекчивилел кьван хкаж хьана, 1938-йисан сифте кьилера ам  бу­рильщиквиле тайинарна.

Гьа и йисуз Гь.А.Темирханов Яру Армиядин жергейриз тухвана. Ватандин ЧIе­хи дяведин йисара Гьажимурада вич халис ватанперес яз къалурна ва адан лайихлувилер гьукуматдин наградайралди — Ватандин дяведин 1, 2 ва 3-дережайрин ордендалди, “Дирибашвиляй”, “Кенигсберг къачунай”, “1941-1945-йисарин Ватандин ЧIехи дяведа гъалиб хьунай” медалралди къейдна. Рига, Шяуляй, Хайлигенбайль, Мельзень, Вармудитт шегьерар кьунвай душмандин сенгерар кукIварунин женгера къалурай ви­кIегьвилерай Гьажимурад Алимурадовичаз Верховный Главнокомандующий И.В.Сталинан тIваруни­хъай чухсагъулдин чарар хтанай.

Дяве куьтягь хьайила, Гь.А. Темирханов вичи зегьмет чIугур управленидиз хтана, бурильщиквиле кIвалахал акъваз хъувуна.

Дяведин йисара гуьнгуьникай хкатнавай халкьдин майишат; душманди харапIайриз элкъуьрнавай шегьерар, хуьрер кIвачел ахкьалдар хъувун патал “чIулав къизилдихъ” еке игьтияж авай. Нафт хкудунин кардиз кьвед лагьай фронт лугьузвай. Дяведи нафтIадин буругърин кIвалахдикай къерех хьуниз мажбур авур Гьажимурад Алимурадович пешекарвилин рекьяй вичин чирвилер девирдин истемишунрин дережадиз хкажун патал чалишмиш хьана. Ада буругъар ягъунин рекьяй машгьур устадар тир кьве сеферда Сталинский премиядин сагьиб Агъанейматуладивай, Социализмдин Зегьметдин Игит Рустам Рус­тамовавай, Николай Трегубовавай, Андрей Тараскинавай чирвилер къачуна, абурун тежриба кьуна.

РикIе къаст туна зегьмет чIугур лезги хва вичи тарсар къачур муаллимрилай, вич вердишарай устадрилай вилик фена. Адан гьакъисагъвилин зегьмет, агалкьунар акур трестдин руководстводи Гь.Темирханов буругъдин устIарвиле (мастервиле) тайинарна. Гила ада вичи бурильщикриз, вич хьтин устIарриз буругъар зарбдиз ягъунин кIвалахда цIийи къайдаяр ишлемишунин сирер чириз хьана. Ам нафтIадин буругъар эгъуьнунин карда гзаф цIийивилер кардик кутур ксарикай сад я. Адан бригадади зегьметдин бегьерлувал йис-йисандавай хкаж хьун къазанмишиз, вич залан, четин кIвалах ятIани, гъилевай йисуз вилик ку­май йисан гьисабдай планар тамамариз хьана.

1953-йисуз бригадади, 1954-йисан гьисабдай 4 агъзур метрдиз буругъ ягъу­налди, уьлкведиз 620 агъзур манат кьенятна. И йисан социалистический соревнованидин нетижайрай ВЦСПС-ди ва уьлкведин нафтIадин промышленностдин министерстводи устIар Гь.Темирханован бригададин гьакъисагъ зегьмет 2-чка ва 15 агъзур манат премия гуналди къейдна.

НафтIадин ва газдин промышленность вилик тухунин карда къазанмишай­ зурба агалкьунрай Гьажимурад Алимурадовичаз СССР-дин Верховный Советдин Президиумдин Указдалди 1959-йисуз Ленинан орден ва Къизилдин гъедни галаз Социализмдин Зегьметдин Игитвилин чIехи тIвар гана. Ам СССР-дин Верховный Советдин Президиумдин ва Азербайжан ССР-дин Верховный Советдин Президиумдин, ВЦСПС-дин, АСПС-дин, СССР-дин ва Азербайжандин нафтIадин промышленностдин министерствойрин гьуьрметдин грамотайрин, “Азербайжан ССР-дин нафтIадин лайихлу устIар” лагьай гьуьр­метдин тIвар­­цIин сагьиб хьана.

Эхиримжи йисара Гь.Темирханов Кьасумхуьрел яшамиш хьана. Ам 1993-йисан 19-июлдиз рагьметдиз фена, хуьре кучукнава.

Гь.Темирханова уьмуьрда вичин дерин ва гегьенш гел туна.

Къе Гьажимурад Алимурадович чидайкьванбуру игит лезги хцин баркаллу крар, адан гуьзел къамат рикIел хкизва ва адан руьгьдиз икрамзава.

Хазран Кьасумов