Муаллимрин йикъан вилик Сулейман-Стальский районда РД-дин Халкьдин Собранидин образованидин, илимдин, культурадин, жегьилрин крарин ва туризмдин комитетдин председателдин заместитель Гьамидулагь Мегьамедов умуми образованидин идарайрин регьберрихъ галаз гуьруьшмиш хьана.
Мярекатда Сулейман-Стальский райондин кьил Нариман Абдулмуталибова, депутатрин райсобранидин председатель Штибег Мегьамедханова ва жавабдар маса ксарини иштиракна.
Муаллимрин йикъан вилик муаллимрин, яни школайрин месэлайрихъ яб акалун, абур гьялдай рекьер-хуьлер жагъурун — им хъсан кIвалах я. И кар анал рахай гьар сада къейдна. РД-дин Халкьдин Собранидин векилди тIал алай месэлаяр гьялуник къуьн кутун хиве кьуна.
Райондин образованидин управленидин начальник Къачабег Аминова лагьайвал, кIелунин йис башламишна са варз алатнава, амма школаяр учебникралди тамамвилелди таъминарунин месэла къени гьялнавач. Идалайни гъейри, райондин школаяр патал ганвай пассажирар тухудай 14 автобусдикай 10 ишлемишдай ихтияр авай вахт куьтягь хьанва. И ва маса месэлайриз талукь чарар РД-дин образованидин ва илимдин министерстводизни ракъурнава.
Къачабег Аминова кIелунин планар тестикьарунин карда четинвилер хьуниз талукь яз кудай месэладай рахунар “Информационный методцентр” МКУ-дин директор Муминат Бабахановади, Сийидхуьруьн школадин директор Ямудин Исаева, ЦIийи Макьарин школадин директор Жасмина Абасовади, Кьулан-СтIалрин школадин директордин заместитель Зоя Гьабибулаевнадини авуна.
Къарагъарай месэлайриз талукь яз эхирдай Гьамидулагь Мегьамедова вичин къейдер гана.
— КIелунин план — им школадин кьилин документ я. Ам вичин вахтунда тестикьарун герек я. Муаллимриз отпускдиз фидалди кIелунин цIийи йисуз чпин кIвалахдин сятерин кьадар чир хьана кIанда. И къанун инкарна, Федеральный компонент чIурун герек туш, — алава хъувуна ада.
Гь.Мегьамедов дидед чIалан тарсариз, мажибрин гьевес кутазвай пай чара авуниз, 1-4-классра авай аялриз тIуьнар гуниз талукь ва маса месэлайрални акъвазна.
Гьазурайди — Дагъви Шериф
