1-октябрдиз Мегьарамдхуьруьн райондин кьил Фарид Агьмедова вичин заместителрин, администрациядин къурулушдик акатзавай подразделенийрин руководителрин ва къанун-къайда хуьдай органрин векилрин иштираквал аваз нубатдин совещание кьиле тухвана. Идан гьакъиндай “Лезги газетдиз” муниципалитетдин администрациядин пресс-къуллугъди хабар гана.

Совещанидал Фарид Агьмедова район  яшайишдинни экономикадин жигьетдай вилик тухуниз талукь лап важиблу месэлаяр къарагъарна, анал райондин гьар йикъан кIвалахдиз талукь месэлаярни веревирдна.

Ф.Агьмедов район патал кар алайбурукай сад тир хуьруьн майишатда­ авай гьалдал акъвазна. ИкI, аграрийри бегьер кIватI хъувун давамарзава. Алай вахтунда 38,050 агъзур тонн емишар, 10,155 агъ­зур тонн ципицIар, 79,130 агъзур­ тонн салан майваяр, 10,360 агъзур тонн картуфар, 2,184 агъзур тонн бустандин майваяр, 1,620 агъзур тонн гьажибугъдаяр кIватI хъувунва. 39,810 агъзур тонн алафар гьазурнава. Райондин майишатра бегьер кIватI хъувунин кIвалахар давам жезва.

Райондин кьил хуьруьн майишатдин  кIватI хъувунвай продукция маса гуниз талукь месэладални акъвазнава.

“Чна хуьруьн майишатдин продукция маса гунин патахъай икьрарар ку­тIун­нава. Амма идал сергьятламиш хьа­на виже къведач, мадни вилик фин, инвесторар желб авун, хуьруьн майишатдин продукция маса гудай сеть гегьеншарун герек я”, — къейдна ада.

Райондин кьилин сад лагьай заместитель Гьабибуллагь Мурадалиева  оптово-распределительный центр (ОРЦ) эцигунин кIвалахар кьиле физвай гьалдикай малумат гана.

Мажибар вахт-вахтунда гунин месэла райондин кьилин кьетIен гуьзчивилик ква. Совещанидал къейд авурвал, вири идарайри ва организацийри ра­ботникриз мажибар вахт-вахтунда гузва. Районда гьалар пайгардик ква.

Совещанидал веревирд авур месэлайрай талукь тир тапшуругъар гана.

«Лезги газет»