26-сентябрдиз Дагъустандин виликан кьилин стха, республикадин Халкьдин Собранидин депутат Ражаб Абдулатипов кьуна. Идан гьакъиндай журналистриз Россиядин Силисдин комитетда малумарна.
“Дагъустандин Халкьдин Собранидин депутат Ражаб Абдулатипов тахсиркарвилин дестеда иштиракунай кьунва. Мукьвал вахтунда РФ-дин УК-дин 210-статьядин 2-паюнай (“Тахсиркарвилин десте тешкилунай”) адак тахсир кутазвайди малумарда. А дестедин членри ришвет къачуз, законсуздаказ гражданриз набутвилер тайинарзавай. Идалай вилик гьа и уголовный делодай республикадин медико-социальный экспертизадин бюродин руководитель Мегьамед Махачев ва адан гъилик квай ксар кьунай”, — лагьана ведомствода.
28-сентябрдиз Махачкъаладин Советский райондин судди Дагъустандин Халкьдин Собранидин депутат Ражаб Абдулатипов тахсиркарвилерин десте тешкилунай, законсуздаказ гражданриз набутвилер тайинарунай кьуна.
“Къе Махачкъаладин Советский райондин судди 10 йикъан вахтунда адаз кьунин къарар акъудна”, — лагьана суддин векилди. Адан гафаралди, эгер адак тахсир кваз хьайитIа, ам кьунин вахт кьве вацран вахтуналди — 26-ноябрдалди давамарда.
РФ-дин Силисдин комитетдин официальный каналда малумарзавайвал, Махачкъаладин судди силисдин тIалабун кьилиз акъудна ва Абдулатипов кьве вацра дустагънава.
Ражаб Абдулатипов 1997-2000-йисара Дагъустандин миграционный къуллугъдин руководитель, 2002-2016-йисара Дагъустанда авай Россиядин УФМС-дин начальник, МВД-дин Дагъустанда авай миграциядин крарай управленидин начальник тир. 2016-йисан сентябрдилай ам Дагъустандин Халкьдин Собранидин образованидин, илимдин ва культурадин, жегьилрин, спортдин ва туризмдин крарай комитетдин председателдин къуллугъдал алай.
Дагъустандин Халкьдин Собранидин депутат Ражаб Абдулатипован адвокатди ам дустагъунин жигьетдай Махачкъаладин Советский райондин судди акъуднавай къарардал рази туширди къалурна. Идан гьакъиндай “Лезги газетдиз” Абдулатипован адвокат Мирзехан Гьасанова малумарна.
Ислен юкъуз чна Дагъустандин Верховный суддиз арза вугана, — лагьана М.Гьасанова. Адан гафаралди, Ражаб Абдулатиповаз талукь яз “уголовно-процессуальный законда къалурнавай истемишунрал амал авунвач”.
“Кьилди къачуртIа, тахсирлу авун патал кьабулзавай серенжем бинеламишдайла къалурнава хьи, шак физвай шагьидриз зур къалурун, чуьнуьх хьун ва силисдиз маса жуьреда таъсир авун, тахсирлу тирди субутарзавай делилар терг авун мумкин я. Амма и крар садни авач”, — къейдна адвокатди.
Уголовный делодай силисдин кIвалахар кьиле тухузва, ришвет къачур 6 дуьшуьш тайинарнава.
Адвокатдин гафаралди, Ражаб Абдулатипова “вичин тахсир хиве кьазвач, са гьихьтин ятIани тахсиркарвилерин дестедихъ галаз вичин алакъа аваз хьайиди инкарзава”.
«Лезги газет»
