Дагъустанда етим ва диде-бубадин къаюмвиликай хкатнавай 300-далай виниз аялар алай йисуз кIвалералди таъминарун пландик кутунва. Идакай “Лезги газетдиз” алатай гьяддиз республикадин образованидин ва илимдин министерстводай хабар гана.

“Чеб кIвалералди таъминарун лазим тирбурун жергедик акатзавай етим ва диде-бубадин къаюмвиликай хкатнавай 313 аялдиз алай йисуз кIвалер гун планламишнава”, — лагьана ведомстводин векилди. Адан гафаралди, и месэла гьялун патал 257 миллион манатдилай артух пул чара авунва, идакай 150 миллион манат-республикадин бюджетдай.
Мадни малум хьайивал, алатай йисуз республикада винидихъ къалурнавай категориядик акатзавай 322 аял кIвалералди таъминарна. И мурадар патал 265 миллион манатдилай артух пул чара авунвай. Республикадин образованидин ва илимдин министерстводин делилралди, къенин юкъуз Дагъустанда етим ва диде-бубадин къаюмвиликай хкатнавай, чеб кIвалералди таъминарун лазим тирбурун жергедик квай аялрин кьадар 2800-далай виниз я.
Виликдай “Лезги газетди” Дагъустанда етим аялриз кIвалер чара авун пландик кутунвай муниципалитетра абурун кьиле авай ксарин хиве “неинки вахтунда кIвалералди таъминарунин, гьакIни етим аялриз гузвай кIвалерин еридин жигьетдайни жавабдарвал авайдакай” хабар ганай.

«Лезги газет»