Дагъустандин 16 районда зулун магьсулар кIватIунин кIвалах башламиш хьанва.
Эхиримжи делилралди, вири жуьрейрин майишатра санлай къачурла, 2 агъзурни 322 гектардай 5 агъзурни 323 тонн бегьер кIватI хъувунва, хабар гузва РД-дин хуьруьн майишатдин ва недай суьрсетдин министерстводи.
Тешкиллудаказ кIвалах Хасавюрт райондин майишатри башламишнава, ина 500 гектардай 1 агъзурни 250 тонн бегьер кIватIнава.
РикIел хкин, алатай йисуз Дагъустандин хуьруьн майишатдин зегьметчийри тахминан 220 агъзур тонн зулун магьсулар кIватIнай. А чIавуз са гектардин бегьерлувал 26 центнердилай артух тир (цIи — 25 центнердив агакьна). Техил кIватIзавайбурун арада виридалайни виниз тир нетижаяр алатай йисуз Хасавюрт, Къарабудахкент, Къизляр ва Къаякент районриз хьанай.
Алай вахтунда Дагъустандин майишатра векъи алафар гьазурунин кIвалахни худда кьиле тухузва. Эхиримжи делилралди, санлай къачурла алукьзавай кьуьд патал 365 агъзур тонндилай артух алафар гьазурнава, абурукай 352 агъзур тонн векьер ва 13 агъзурни 600 тонн сенаж я. Идалайни гъейри, Дербент, Сулейман-Стальский ва Казбековский районри 1,7 агъзур тонн силос гьазурнава.
Виридалайни гзаф алафар Къизляр (60 агъзур тонн), Хасавюрт (38 агъзур тонн), Бабаюрт (36 агъзур тонн) ва Тарумовский (32 агъзур тонн) районрин майишатри кутунва.
Алай йисан гатфариз мукьвал-мукьвал марфар къунин нетижа яз, гзаф йисара экъечIдай хъчар-векьер къалиндаказ акьалтнава.
РикIел хкин, эхиримжи йисара регионда алафар гьасилунин кардиз еке фикир гуз башламишнава, вучиз лагьайтIа, малар хъсан гьалда аваз хуьн патал абур кфетлу алафралди таъминарун лазим я. И макьсаддалди, республикадин аграрийри кьуьд патал векъи ва миже квай алафар, комбикормаяр гьазурзава.
Министерстводин пресс-къуллугъди хабар гузвайвал, алай вахтунда Дагъустанда майвайрин, картуфрин ва емишрин бегьер кIватIунин кIвалахни ргазва. Эхиримжи делилралди, 2 агъзурни 443 гектар майдандай 104,5 агъзур тонн майваяр вахчунва.
И йикъара бегьер кIватIунив Дербент райондин майишатар эгечIнава, ина 6,4 агъзур гектардай 92 агъзур тонн майваяр кIватIнава.
Картуфрин бегьер вахчунин кIвалахда Къизилюрт райондин, емишрин — Мегьарамдхуьруьн райондин майишатар кIвенкIвечи чкайрал ала.
Къейд ийин, Сулейман-Стальский районрани бегьерлувал винизди я — са гектардай 100 центнер. КIвенкIвечийрин жергеда гьакIни Къайтагъ, Хив, Буйнакский, Казбековский районар ава.
