“Иман” вуч лагьай чIал я?

Араб чIалай таржума авурла, “иман” — инанмишвал лагьай чIал, Мугьаммад Пайгъам­барди  гваз атай вири затIар тамамвилелди кьабу­лун­, яни ада Аллагь-Тааладин патай халкьдал агакьарай ва лагьай  вири гафарихъ инанмиш хьун я

Имандиз шумуд дестек ава?

Ругуд дестек: Аллагьдихъ, Адан малаикрихъ, ктабрихъ, пайгъамбаррихъ, Къияматдин йикъахъ, кьадар-кьисметдихъ, яни вири хъсанвилер ва писвилер Аллагьдин кьадардалди жезвайдахъ инанмиш хьун.

Имандин дестекрикай сад кьванни кьабул тийизвай инсандиз вуч жеда?

Имандин и ругуд дестекдикай садахъ кьванни инанмиш тахьай ва я шаклу хьайи кас диндай акъатзава. Ада, и кардин патахъай гьайиф чIугуна, рикIин сидкьидай туба авуна, Аллагьди­вай гъил къачун тIалабна кIанда. Ахпа ада шагьада кIелна кIанда ва вич кIелзавайдан мана­дин гъавурда хьун лазим я. Имандин вири ругуд дестекдихъ ва гьакIни Мугьаммад Пай­гъам­барди  чал агакьарай вири чирвилер гьакъикъат тирдахъни инанмиш хьана, ибур вири инсанди вичин рикIяй тестикьарна ва мецелди ван алаз лагьана кIанда.

Аллагьдихъ гьикI инанмиш хьана кIанда?

Аллагьдихъ инанмиш хьун — им Аллагь Тек, Ам ибадат авуниз лайихлу, Адаз ибадат авун ча­расуз тирдахъ, са шакни авачиз, инанмишвал я. Аллагь гьамиша авайди я — я эвел, я эхир ава­чиз. Вахтуни Ам дегишарзавач ва Адаз вахт­ни дегиш жезвач. Ам са касдилайни ва са за­тIу­нилайни аслу туш. Адаз тешпигь (ух­шар) са затI­ни авач. Ам са затIунизни ва са касдизни ух­шар  туш ва Адаз ухшар авай са затIни, са кас­ни авач. Ам чан алай, вири крар  ийиз алакьзавай, вири чизвай, вири аквазвай, вири шейэрин ван къвезвай ва рахазвай Аллагь я. Вири хъсанвилер ва писвилер Адан ихтиярдалди жезва. Амма писдалай Ам рази жезвач, хъсанди Адаз бегенмиш я. Аллагьди вири затIар халкьзава, абурал  агъа­валзава, Адаз абур терг ийидай къуват ава. Ам дувандин йикъан Пачагь я. Ам чи вири махлукьатрин Аллагь я. Аллагьдиз шерик гъун, Адаз са вуж ятIани ва я са вуч ятIани барабар авун акьал­­тIай залан гунагькарвал я, адаз ширк лугьуда.

ГьакIни Аллагь-Тааладиз Вичиз чарасуз хас тир къад сифет ва 99 гуьзел тIварар (“Аль-Асма аль-гьусна”), къад адаз хьун мумкин тушир, гьич ви­же текъвер ери ва мумкин тир са ери авайдахъ инанмиш хьун лазим я. Аллагь-Тааладиз лап та­мам ва Адан чIехивилиз лайих тир сифетар авайдахъ ва Ам Вичин чIехивилиз лайих тушир гьар са нукьсандикай михьи тирдахъ инанмиш хьана кIанда.

«Ас-салам» газетдай