И сеферда чна газет кlелзавайбур мад са машгьур лезгидихъ — Россиядин карчи, “Метафракс” ПАО-дин (публичное акционерное общество) сагьиб, энергетикадин ва химиядин промышленностдин хиле алакьунар авай пешекар, хсуси инвестор ва мергьяматлу крар кьилиз акъудзавай чи ватанэгьли Сейфеддин Зиаддинович Рустамовахъ галаз танишарда.
Къейд ийин, алай йисуз “Forbes” журналди туькlуьрнавай Россиядин виридалайни девлетлу карчийрин сиягьда вичихъ 550 миллион доллар авай С.Рустамов 184-чкадал ала. Ам 1962-йисан 17-июндиз Кцlар шегьерда дидедиз хьана. 1990-йисара С.Рустамова Пермский крайдин химический хиляй кlвалахзавай лап чlехи идараяр хуьнин, дегишарунин гьерекатра иштиракна. 2000-йисалай карчиди химический ва нефтехимический промышленностдин продуктралди алишверишда, нефтегазовый проектра, мергьяматлувилин крара иштиракзава. 2014-йисуз чи ватанэгьлидикай Россиядин зурба “Метафракс” комбинатдин регьбер хьана. И тешкилатди метанол, формалин, синтетикадин шкьакь ва хейлин маса затlар арадал гъизва, абур дуьньядин 50-далайни гзаф уьлквейриз ракъурзава.
“Метафраксди” регионда яшайишдин, медениятдин, образованидин ва спортдин проектриз куьмекзава. Йисан къене и тешкилатди миллионралди пулар мергьяматлувилин рекье харжзава. Гьа са вахтунда Сейфеддин Рустамова вичин уьмуьрдин юлдашдихъ галаз медицинадин, образованидин, искусстводин хилериз куьмек гузвай хейлин фондарикни чпин пай кутазва.
2016-йисуз “Метафракс” ПАО-ди аммиакдин, карбамиддин, меламиндин кьетlен комплекс эцигуник кьил кутуна. Тlвар кьунвай инвестициядин зурба проект кардик кутун 800 миллион евродай акъваззава. И кар патал С.Рустамова гзаф алахъунар ийизва. Ам проект кьилиз акъуддай ва талукь тир тадаракар гъидай Швейцариядин Casale SA компаниядин векилрихъ галаз гуьруьшмиш хьана.
2017-йисуз “Матафракс” ПАО-да дегишвал арадал атана: исятда адаз Россияда ва Европада затlар арадал гъидай еке мумкинвилер авай компанийрин группа лугьузва. “Метафракс” ГК-ди (группа компаний) йисан къене 40 миллиард манатдин хийир гъизва.
Сейфеддин Рустамован хизанда пуд аялдиз тербия гузва. Машгьур ватанэгьлидин крар къуй мадни виликди фирай!
Куругъли Ферзалиев
