Инсандиз океандикай акьван гзаф чирвилер, делилар авач. Гьатта чи йикъарани ам тамамвилелди ахтармишнавач. Вахтар фирдавай цин дегьнейра яшамиш жезвай, амма инсанриз икьван чlавалди ван тахьай гьайванарни малум жезва. Къейдзавайвал, океандин дегьнейрин вири сирер гьеле инсаниятдиз тамамвилелди малум туш.
Океандин кlане яшамиш жезвай итижлу, гьайбатлу гьайванрикай сад скат, вични электричество квай балугърин са жуьре я. Адан тумунал 15 сантиметрдин яргъи цаз ала, гьавиляй ам хаталу я. Идалайни гъейри, адан и “яракь” зегьерлудини яз чида. Скатдин токди инсан ягъайтlа, ам рекьин мумкин я. Амма инсан скатдин токди ягъай дуьшуьшар садрани арадал атанвач, гьикl хьи, инсан патал адан ток анжах скат тамамдаказ къужахда кьуртlа хаталу я.
Тихий океандин тайифайри скатдин цацарикай хьелерин ва жидайрин кlвенкlвер туькlуьрзавай. Ихьтин яракьди мидядал хер авунилай гъейри, адак кьиникьал гъун мумкин тир зегьерни кутазва. Скат балугъдин жуьреяр са шумуд ава. Вилик вахтара скат акуладикай арадал атанвайди яз гьисабзавай, амма алимри ахтармишунар кьиле тухвайдалай кьулухъ, и фикир инкарна. И балугъдик кlарабар квач, ам тамамвилелди чlахачlахдикай ибарат я. Скатри тlуьниз жуьреба-жуьре балугъар ишлемишзава. Тlуьн жагъурдайла, скатри, кьилин “яракь” яз, электричестводикайни менфят къачузва.
Гьазурайди — Куругъли Ферзалиев
