Чи хуьрера инсанриз кIвалах авач, гьавиляй гзаф жегьилар патарални физва лугьуз тестикьариз алахъзавайбурухъ галаз Эминхуьряй тир Миламудин Мегьамедов (шикилда) эсиллагь рази туш.
— ТIебиатдин шартIариз, накьвадин гужлувилиз, мумкинвилериз килигайла, чи ерияр кIвалахдай, суьрсет гьасилдай инсанриз жагъин тийидай хьтин чкаяр я, — лугьузва М. Мегьамедова. — Менфят къачун тийиз гадарнавай чилерни чахъ тIимил авач. Чилел кIвалахдай касдиз гьукуматдини куьмекар гузва, райондин территориядани махсус проектар, программаяр кардик кутазва. Къачу чил, ая кIвалах, гьасила суьрсет, мад вуч кIанда кьван?!
Миламудин Мегьамедова вичин гафар гьакъикъи краралди, вичин чешнедалди тестикьарзава. Ам 2006-йисалай, арендатор яз, уьзуьмчивилел машгъул жезва.
Чилин къадир авай, зегьметдал рикI алай лежбер итим тир М.Мегьамедов эхиримжи вахтара кIвалахда цIийивилер тунал, райондин шартIара икьван чIавалди авачир сортарин емишар гьасилунал машгъул я.
— Чи хизан Советрин девирда Узбекистанда яшамиш хьайиди я, зи кьве стха чпин хизанарни галаз гилани гьана ава, — суьгьбетзава М.Мегьамедова. — За Узбекистандин Бухара ва Термез шегьерра кардик квай къелемлухрай Юкьван Азиядин республикайра экъечIзавай емишрин къелемар гъана, Эминхуьре — жуван арендадин участокда цанва. Пешекарри тестикьарзавайвал, гьа тарари чи шартIарани хъсан бегьер гуда.
Ингье Миламудинахъ галаз чун адан арендадин участокда къекъвезва, ада заз цIийиз цанвай къелемрикай, са шумуд йисалай абуру гудай бегьердикай, емишрин менфятлувиликай итижлу ихтилатар ийизва. ИкI, ада Узбекистандай гъана “Пикан” сортунин кIерецар чиле цана, абурай таза къелемар экъечIнава. М. Мегьамедова чаз лагьайвал, чпин ватан Кьиблепатан Америка тир и кIерецрин тарари сифте бегьер къелемар цайи 8 йисалай гъида, са тарци йиса 250-300 килограмм бегьер гуда.
Участокда Узбекистандай гъанвай кIерецрин 200 къелемни цанва.
— И тарар шуьмягърин тарар кьван чIехи жеда, пуд йисалай абуру сифте бегьер гуда, — давамарзава ихтилат арендаторди. — Са тарци 16-20 килограмм бегьер гуда, кIерецарни ципицIрин кулариз ухшарбур жеда.
М.Мегьамедова гьакIни вичин участокда Узбекистандай гъанвай инжилрин, чумалрин, лап куьлуь сортарин ичин (гьардакай 20-25 къелем) ва Азербайжандай гъанвай ири сортарин пIинийрин 20 къелемни цанва, Узбекистандин “Пикан” сортунин 1000-дав агакьна кIерецар хуьрерин агьалийриз, вичин чир-хчирризни гана, гьабуруни цIийи сортунин кIерецар гьасилун патал.
Арендадин участокда чал Миламудинан гада Истамни гьалтна. Эминхуьруьн советдин депутат тир Истам Мегьамедова вичин дахдивай чилел зегьмет чIугунин, бул бегьерар гьасилунин тежриба къачунва.
— Инсандиз кIвалахдихъай кичIе хьун лазим туш, — лугьузва Истама. — Зегьмет чIугуна, бул бегьер гьасилайла, ада гъилиз хъсан къазанжини гъайила, четинвилер, хьайи азиятарни рикIелай физвайди я. КIвалахди зи руьгьдин игьтияжарни таъминарзава. Узбекистандай дахди гъана цанвай къелемрихъ гелкъуьн, абуру гъидай бегьер гуьзлемишун зазни итижлу я.
Чна винидихъ лагьайвал, Мегьамедоврихъ 9 йис идалай вилик кутунвай 3,5 гектар уьзуьмлухарни ава. Чаз акурвал, иесивилелди гелкъуьн тешкилнавай уьзуьмлухра ципицIрин тарифдин бегьер дигмиш жезва. М.Мегьамедова лугьузвайвал, уьзуьмлухрин гьар са гектардай цIи 100-120 центнердилай тIимил тушиз ципицIар кIватI хъийида.
Кьуд гектар шуьмягърин багъни хъсан гьалда ава, люцерна цанвай 2 гектардин майданрай векьерни янава.
Бубани хва Миламудин ва Истам Мегьамедоври чпин участокда мал-къара хуьдай са акьван чIехиди тушир фермадин кIвални эцигнава, 5-6 мал къачунва.
Чаз малум хьайивал, Мегьамедоврин хизандихъ гележегда лежбервилинни фермервилин майишат ачухдай, уьзуьмлухринни багъларин майданар артухардай, малдарвал вилик тухудай фикирни ава.
