ЦIинин гад гзаф ламуди, къайиди хьанва. Гьавадин татугайвилер себеб яз салара, цанвай помидоррин, афнийрин, буранрин, истивутрин ва маса майвайрин штилар сакIани ирелу жезвач, абуруз рагъ бес жезвач. Вучда, тIебиатдин къанунар я. Инлай кьулухъ белки, чимивилер жен. Амма парникра цанвай помидорри, афнийри вахтуниз килигайвал хъсан бегьерар гузва, инсанрин рикIер шадарзава. Пленкадик квай салар Сулейман-Стальский райондин Агъа Макьарин, Герейханован хуьруьн, Векьелрин участокра гзаф ава. А.Абдуразакьов ва Къ.Къазиагьмедов кьиле авай саларбанри, помидорринни афнийрин сифтегьан бегьерар кIватIна, туьквенриз рекье тунва, хейлинбур чкайрални муьштерийриз маса гузва. Инал къейд авун кутугнава: Абдуразакьан теплицайрай кIватIзавай мичIи яру рангунин помидоррилай абур дадмишай гзафбуру тарифдинни разивилин келимаяр лугьузва. Абурухъ лап хъсан дад гала, чпихъ екевални ава, рангунизни мешреблубур я. И кар завайни тестикьариз жеда. Мукьвара туьквендай а сортунин помидорар зани къачуна. Гзаф екебур тирвиляй, за тек пуд помидор терездал эцигна. Абурухъ кьве килодихъ галаз (шикилда) заланвал авай. Мадни алава яз лугьуз кIанзава: и сортунин помидорра гадардай кIап авач, къенепадни хъсандиз чранвайбур я. Сагърай абур битмишарзавай саларбанар. Гележегда Абдуразакьа и сортунин помидорар мадни гзаф цадайвал я.

Райсудин Набиев