Самбодай тренер, СССР-дин спортдин мастер Эмир Севзиханова РД-дин физический культурадин ва спортдин Белижда кардик квай аялринни жаванрин спортшколада кlвалахзава. Ада заз Пермь шегьерда институтдик ва Георгиевский колледждик экечlнавай, вичин гъилик вердишвилер къачур Кемран ва Иса Мегьамедагъаеври, анрани спортдал машгъул хьун давамарна, и рекье агалкьунар къазанмишзавайдакай суьгьбетна.

Каникулриз хтанвай вахтунда зун абурухъ галаз таниш хьана. Малум хьайивал, и стхайри Белиждин гимназияда кlелна. Спортдин рекьяй школадиз Кемран — 5-клас­с­да, Иса 4-классда кlелдайла, чпин бубади гъана, дзюдодай секциядик кутуна.

Эмир Севзиханован гафаралди, абур зайиф аялар тир. Сагъламвилиз хъсан тиртlани, аквадай хьтин гужлувал абурухъ авачир. Къилихриз кьведни секинбур тир. Школадани абуру хъсан къиметар аваз кlелзавай. Тренировкайриз вахтунда къвезвай, гайи тапшуругъар тамама­риз сифте четин тиртIани, яваш-яваш абуру чеб лигимарна, къастунал кIевивал къалурна. Белижда, Дербентда, Избербашда, Махачкъалада кьиле фейи райондин, зонайрин ва республикадин акъажунра абуру приздин чкаяр кьурди я. Гила абуру Россиядин регионра чпин алакьунар къалурзава.

Икl, Кемрана 2017-йисуз джиу-джитсу жуьредай Перм­дин крайдин чемпионатда — 2 чка, 2018-йисуз Пермь шегьердин итимрин чемпионатда мад 2-чка кьазва. Исади Ставропольский крайдин кlвенкlвечивал патал 16-17 йис хьанвайбурун арада какахьай женгерай ва 2018-йисуз Кисловодскда кьиле фейи гъилералди кукIунин са жуьредай Россиядин чемпионатда 3-чка кьазва.

Гьелбетда, им жаванрин чlехи агалкьунар я. Жегьил пагьливанри, спортдин цlийи кукlуш­рихъ хкаж жедай къаст аваз, гужлуз вердишвилер къачузва.

Къуй чи ватанэгьлийрихъ чпи хкянавай рекье мадни чlехи агалкьунар хьурай.

Къагьриман Ибрагьимов