ГТО
Махачкъалада Е.Исинбаевадин тIварунихъ галай стадиондал Вирироссиядин физкультурадинни спортдин “ГТО” комплексдай 3-сеферда Дагъустандин чемпионат кьиле фена. И мярекат государстводин деятель Абдурагьман Даниялов дидедиз хьайидалай инихъ 110 йис тамам хьуниз талукьарнавай.
Спортсменар, абурун муаллимарни тренер, тамашачияр тебрикиз Дагъустан Республикадин Гьукуматдин Председателдин Сад лагьай заместителдин везифаяр тамамарзавай Анатолий Къарибов, РД-дин физический культурадин ва спортдин министрдин везифаяр тамамарзавай Мегьамед Мегьамедов, шегьердин администрациядин спортдин, туризмдин ва жегьилрин крарин рекьяй комитетдин председатель Марат Ибрагьимов, Кьурагь райондин кьил Замир Азизов, РД-дин кьезил атлетикадин федерациядин президент Омар Муртузалиев, РД-да ГТО-дай федеральный векил Курамегьамед Курамегьамедов ва масабур атанвай.
Акъажунра 18-70 йис хьанвай ва абурулай еке яшара авай 400 касди иштиракна.
Дзюдо
Мегьарамдхуьре 2006-2007-йисара дидедиз хьанвай аялрин арада дзюдодай райондин турнир кьиле фена. Ана гзаф хуьрерай атанвай жегьил 72 спортсменди иштиракна. Заланвилин 9 категориядай кьиле фейи итижлу акъажунра абуру чпин алакьунар, гъалибвал къачунин къаст къалурна. Сифтегьан чкаяр кьурбур дипломризни медалриз лайихлу хьана.
Волейбол
Гьа са вахтунда Мегьарамдхуьруьн спортдин маса майдандал итимрин командайрин арада волейболдай акъажунар кьиле фена. Турнирдин нетижайрай Гъепцегьрин команда — сад лагьай чкадиз, ЦIийи Филер — 2-чкадиз, Гилияр 3-чкадиз лайихлу хьана.
Бокс
Дагогни шегьерда 2003-2004-йисара дидедиз хьайи жегьилрин арада боксдай Дагъустандин Кьиблепатан зонадин хкягъунин турнир кьиле фена. Ина 200-лай гзаф спортсменри иштиракна, гьа жигьетдай яз — Ахцегь, Сулейман-Стальский ва маса районрайни.
Сулейман-Стальский райондин патай 9 спортсменди векилвална. Абурун тренер Герейханован хуьруьн 2-нумрадин школадин тренер-преподаватель Роберт Нагъиев я. Абурукай 7 кас финалдиз акъатна. Султан Султанов, Бахтияр Гьажимегьамедов, Амир Таибов чпин заланвилин категорийрай гъалиб хьана.
Гьазурайди — Дагъви Шериф
