САМУР дередин гевгьер

МЕГЬАРАМДХУЬРУЬН РАЙОНДИН — 75 ЙИС

Урусатдин кьиблепатан часпардиз мукьва, саки 655 кв. километрдин мулкунал Дагъустандин виридалайни чIехибурукай сад яз гьисабзавай Мегьарамдхуьруьн район экIя хьанва. ТIебиатдин надир чкайралди, сур тарихдалди, хуьруьн майишатдин къулай шартIаралди, кьегьал рухвайралдини рушаралди девлетлу и макандиз Самур дередин гевгьер лугьузва. Алай вахтунда районда 33 хуьр ава, чкадин агьалийрин кьадар 65 агъзурдалай алатнава.

Аллагьди захавилелди иер тIебиат ганвай Мегьарамдхуьруьн райондин берекатлу чилел 22-сентябрдиз лишанлу вакъиа кьиле фена: район арадал атайдалай инихъ 75 йис тамам хьун чIехи сувар хьиз къейдна.

Мегьарамдхуьруьн райондин баркаллу жемятдиз и югъ РД-дин Халкьдин Собранидин Председателдин заместитель Магьмуд Магьмудова, РД-дин милли сиясатдин министрдин сад лагьай заместитель Арсен Магьмудова, РФ-дин ФСБ-дин РД-да авай Сергьятрин Управленидин Дербентдин къуллугъдин начальник Михаил Поддубныйди, Ленинграддин областдин Тосненский райондин векил Владимир Дернова, РФ-дин УФССП-дин РД-да авай Управленидин регьбер Низами Гьалимова, Дербент райондин кьилин везифаяр вахтуналди тамамарзавай Фуад Шихиева, “Лезги газетдин” кьилин редактор Мегьамед Ибрагьимова, Каспийск шегьердин депутатрин Собранидин председатель Абдулвагьид Жаватова, Дахадаев райондин кьилин сад лагьай заместитель Рамазан Нуьгькъадиева ва масабуру мубаракна. Мегьарамдхуьруьнвийрин тIварцIихъ тебрикдин тел РФ-дин Госдумадин депутат Абдулгьамид Эмиргьамзаевани рекье тунвай.

Экуьнилай гатIунна, райондин культурадин центрадин гегьенш майдандал хуьруьн майишатдин суьрсетрин мекера, жуьреба-жуьре выставкаяр, хуьрерин милли майданар ачухнавай. Абурувай са тIимил яргъа райондин спортшколайра вердишвилер къачузвай жегьилри спортдин акъажунра иштиракзавай. “Мегьарамдхуьруьн район” стелладин къаншарда Тагьирхуьруьн-Къазмайрин искусствойрин мектебда кIелзавай аялри юбилейдиз талукьарнавай концерт гана, симинин пагьливанрини кьуьлердайбуру чпин гьунарар къалурна. Кьуд патахъ зуьрнединни далдамдин ван алахьзавай. Са гафуналди, гьинихъ вил вегьейтIани, аквазвайбур суварин яржар тир.

Сятдин 11-даз юбилейдин шадвилерин кьилин пай ачухуниз талукьарнавай мярекат кьиле фена. Сегьнедиз Мегьарамдхуьруьн райондин кьил Фарид Агьмедов экъечIна. Суварин иштиракчийрихъ элкъвена, ада виридаз райондин югъ ва 75 йис тамам хьун мубаракна. Вичин рахунра ада, гьакъикъи рекъемар, делилар гъуналди, райондин яшайишдин, экономикадин, культурадин ва маса хилера къазанмишнавай агалкьунар къейдна, районда инвестицийрин сиясат вилик физвайдакай лагьана. Адан гафарай малум хьайивал, Мегьарамдхуьруьн райондин мулкарал инвестицийрин са шумуд проект кьилиз акъуднава ва и кар давам жезва. Нетижаяр кьуналди, райондин кьили вилик тамамарна кIанзавай гзаф крар, месэлаяр акъвазнавайдини раижна.

“Гзаф кIвалахар авунва, мадни гзаф хъувуна кIанзава. Чакай гьар сада район вилик финик пай кутунихъ еке метлеб ава. Чна пара къени чилел уьмуьр кьиле тухузва. Чун и чилиз вафалу хьана, ам генани аваданлу ва девлетлу ийиз алахъна кIанда. Халкьдихъ ихьтин камаллу мисал ава: “Алатай вахтар чирун, къенин югъ ва гележег яратмишун герек я”, — лагьана Фарид Агьмедова.

Мегьарамдхуьруьн райондин агьалийриз сувар Дагъустандин Кьил Владимир Васильеван ва РД-дин Халкьдин Собранидин Председатель Хизри Шихсаидован патай — Магьмуд Магьмудова, РД-дин милли сиясатдин министерстводин патай Арсен Магьмудова мубаракна. А.Магьмудова гьакIни Фарид Агьмедовав министерстводин гьуьрметдин “За мир и согласие” знакни вахкана. Министрдин сад лагьай заместителди къейд авурвал, гьар са регион яшайишдинни экономикадин рекьяй вилик финин бинеда ислягьвал, дурумлувал ва миллетрин дуствал ава. Ада Мегьарамдхуьруьн районда кар алай и терефар генани мягькем хьун алхишна.

Мярекатдин сергьятра аваз лишанлу мад са вакъиа кьиле фена: Мегьарамдхуьруьн райондин кьил Фарид Агьмедова ва Урусатдин кеферпата авай Карелия Республикадин Суоярвский райондин администрациядин кьил Олег Болгова, кьве районди, хванахвавилин икьрардин сергьятра аваз, гележегда амадагвилин алакъаяр хуьдайди тестикьарзавай документдал къулар чIугуна.

Олег Болгова лагьана: «Суоярвский район, Мегьарамдхуьруьн район хьиз, часпардал ала. Сад – Азербайжандихъ, садни — Финляндиядихъ галаз. Урусатдин кьиблепатани кеферпата авай чи районар гзаф крара сад-садаз ухшар я…”.

Фарид Агьмедован гафаралди, къулар чIугунвай икьрарди Мегьарамдхуьруьн район яшайишдинни экономикадин жигьетдай вилик финиз таъсирда. “Тежрибади къалурзавайвал, маса регионрихъ галаз алакъаяр хуьни райондин мумкинвилерин сергьятар мадни гегьеншарзава”, — къейдна ада.

Гаф кватай чкадал лагьана кIанда, Мегьарамдхуьруьн районди Ленинграддин областдин Тосненский райондихъ галаз жуьреба-жуьре рекьерай амадагвилин алакъаяр хуьз са шумуд йис я.

Мярекат физвай чIавуз Фарид Агьмедова Мегьарамдхуьруьн район вилик финик лайихлу пай кутунвай са жерге юлдашрив наградаяр вахкана.

Гуьгъуьнлай сегьне манияр лугьудайбурунни кьуьлердайбурун ихтиярда туна. И юкъуз ина «Самурдин зул» лишандик кваз Дагъустандин халкьдин яратмишунрин фестиваль кьиле фена. Ана Ахцегь, Акуша, Табасаран, Сулейман-Стальский, Къизляр, Хунзах, Сергокъала, Къаякент, Новолак, Дербент районрин ва Къизляр, Дагъустандин Огни, Дербент шегьеррин яратмишунардайбурун коллективри иштиракна.

Суварин мугьманар хуьруьн майишатдин мекерадихъ, выставкайрихъ галаз мукьувай таниш хьана, хуьрерин милли майданрал фена, лезги халкьдин милли хуьрекрикай дадмишна, манийрихъни авазрихъ яб акална, кьуьлерна. Урусатдин сергьятар хуьдайбурун Мегьарамдхуьруьн районда авай отделенидин векилри дявединни чуьлдин шартIарин кухня ачухнавай ва гьевес авай гьар садаз аскеррин тIуьнрин дад гьихьтинди ятIа чирдай мумкинвал авай.

Юбилейдиз талукьарнавай мярекатар геждалди давам хьана. Абур йифиз Мегьарамдхуьре цавуз салютар ахъаюналди акьалтIарна.

Агьмед Магьмудов