Лезги, урус, агъул чIаларал вичин эсерар кхьизвай чаз са кас чида: Кьурагь райондин Хпуькьрин хуьре дидедиз хьайи Агьмедов Камалдин Агьмедович.
Ада хуьруьн школа, Дербентда педучилище, Махачкъалада ДГУ-дин филфак куьтягьна, армиядин жергейра къуллугъна. 1967-йисалай хайи хуьре мектебда кIвалахна, жегьил несилриз урус чIалай ва литературадай дерин чирвилер гана. Алай вахтунда ам Рутул райондин Агъа ГуьтIруьхрин хуьре яшамиш жезва.
Ам РФ-дин писателрин Союздин член, зегьметдин ветеран, РФ-дин образованидин отличник я.
Камалдина гьеле студент тирла эсерар теснифзавай. Асул гьисабдай, ам лезги шаир хьиз кьабулнавай. ГьикI хьи, а вахтара агъул чIалал кIелун-кхьин арадал гъанвачир.
Алатай асирдин 90-йисара чи республикада агъул чIалан азбука, сифтегьан учебникар, идахъ галаз сад хьиз, а чIалал художественный эсерарни майдандиз акъатна. И крарин эвел кьиле хьайиди, гьакI гилани вичин руьгьдин къуватар серфзавайди шаир ва муаллим Камалдин Агьмедов я. Илимрин доктор, ДГУ-дин филфакдин декан Шабан Абдулкъадирович Мазанаева Камалдин Агьмедоваз агъул чIалан ва литературадин “сифте чубарук” лугьун дуьшуьшдин кар туш.
Камалдин Агьмедова агъулрин хейлин манияр, мисалар, риваятар кIватI хъувуна, хейлин классикрин (лезги ва гьакI маса миллетрин) эсерар агъул чIалаз таржума авуна.
Чи вилик адан агъул чIалал цIийиз акъатнавай ктаб “Хкягъай эсерар” ква. И кIватIалда автордин вичин эсеррихъ галаз санал дагъустанви шаиррин — Етим Эминан, Хуьруьг Тагьиран, Мегьамед-Загьид Аминован, Мегьамед Агьмедован, Арбен Къардашан, масабурун эсерарни гьатнава.
Мердали Жалилов
