Мегьарамдхуьруьн райондин умуми образованидин идарайра терроризмдин идеологиядиз аксивалуниз ва рекьера гьерекатзавабурун хатасузвилиз талукьарнавай серенжемар давамарзава.

Икl, и йикъара Гилийрин мектебда «Мектеб террордиз акси я!» лишандик квай мярекат кьиле фена. Ана Мегьарамдхуьруьн имам Мумин-гьажи Бидирханова ва Гилийрин хуьруьн полициядин участковый Аким Аюбова иштиракна.

Мугьманри школьникрихъ галаз «Экстремизм ва терроризм вуч я?», «Абурухъ галаз гьикl женг тухуда?» темайрай суьгьбетар кьиле тухвана. Терроризмдини экстремизмди обществодиз гьихьтин къурху гузватlа лагьана. Школьникрини активдаказ иштиракна, абуру мярекатдиз талукь темадай таъсирлу шиирар кlелна ва чпин суаларни гана. Мугьманри абурун суалриз тайин жавабар гана.

Къейд ийин, Гилийрин мектебда и юкъуз мектебда кlелзавайбуруз рекьерани куьчейра чеб хатасуздаказ тухуниз талукь суьгьбетарни кьиле фена. Кьилди къачуртlа, школьникриз ДТП-рин асул себебар ачухна, абуруз рекьера хасаратдин дуьшуьшар тахьун патал гьикl къекъуьн лазим ятlа ихтилатна.

Мярекат себеб яз мектебда кlелзавайбур хейлин месэлайрин гъавурда гьатна.

Метлеблу мярекат тешкилайди мектебдин директордин заместитель Диана Пирмегьамедова я. Чешмеди алава хъийизвайвал, ихьтин жуьредин мярекатар Мегьарамдхуьруьн райондин мектебра мукьвал-мукьвал тухузва.

«Лезги газет»