И йикъара Лезги театрдин артистри Ахцегь райондин медениятдин маканда «Чlулав хамунинди» тlвар алай тамаша къалурна. Тlвар кьунвай эсердин (пьеса) автор Осетиядин тамашиятчи Асахмат Айларов я.

Тамашадиз райондин кьил О.Абдулкеримова, райондин медениятдин идарайрин векилри ва масабуру килигна. Тамашачийрин вилик тебрикдин гафар театрдин режиссер Мирзабег Мирзабегов рахана. Ада тамашадихъ чи аямда авай важиблувални метлеблувал къейдна. Кьилди къачуртlа, ана хизандин уьмуьрдикай, намусдикай, имандикай, буржийрикай, къайгъударвиликай ва кlанивиликай ихтилат физва. Тамашадин кьилин игит Къарабег я. Сегьнеда эцигай эсердай аквазвайвал, Африкада чlехи хьайи Къарабег вичин буба жагъурун патал Кавказдиз къвезва. Амма ина ам садани саймишдач. Гуьгъуьнлай гадади инсанрин арада тафават тун тавунин вичин амалралди, инсандиз адан хамунин рангунизни имандиз килиг тавуна, гьуьрмет авун герек тирди малумарна.

Тамашадиз килигайдалай кьулухъ тамашачийрин патай Ахцегь райондин кьил Осман Абдулкеримова театрдин коллективдиз чухсагъул малумарна ва  актеррин устадвилин тарифна.

«Лезги газет»