И йикъара Мегьарамдхуьруьн райондин Гъепцегьрин хуьряй чав чIулав хабар агакьна: 87 йисан яшда аваз, чаз фадлай кхьизвай яшлу мухбир, шаир, халис зегьметчи инсан, къени хизандин кьил Исмихан Къадимович Къадимов рагьметдиз фена.
И.Къ.Къадимов 1931-йисуз Докъузпара райондин Гъепцегьрин хуьре дидедиз хьана. Хайи хуьре, колхозда кIвалахиз, ада юкьван школа акьалтIарна. Советрин Армиядин жергейра къуллугъна хтана, лежбервилин крар бегьемарна, хизанни хвена, хуьрни.
1968-йисалай инихъ адан шиирар, макъалаяр, юморескаяр печатдиз акъатзавай. Саки вири яратмишунар хуьруьн тематикадиз ва тIебиатдиз талукьбур я. Адан шиирринни поэмайрин “ТIебиатдин сегьне”, “Хизан сир я”, “Шарвили”, “Яйлах” ва маса кIватIалар чи гъилера ама. “Шарвили” поэмадай автордиз Шарвилидин премия гана.
Шаирдин — зегьметчидин ирс адан рухвайри, багърийри давамарзава. Хва Къадим машгьур художник я.
Чна рагьметлудан хизандиз, мукьва-кьилийриз, багърийриз, вири гъепцегьвийриз башсагълугъвал гузва. Исмихан Къадимовичан экуь къамат чи рикIелай садрани алатдач.
«Лезги газетдин» редакциядин коллектив
