Терроризм, экстремизм. И гафарин ван хьайила, гьар са касдин вилик ягъунар, кьиникьар, барбатI хьанвай чкаяр авай шикилар акъатзава.
2000-йисара Дагъустанда ва гьакI Россиядани терроризмди кьил хкажайдалай инихъ ислягь халкьдин секинвал квахьна. Иллаки 2004-йисан 1-сентябрдиз Кеферпатан Осетиядин Беслан шегьердин школада, 2002-йисан 9-майдиз Каспийскда, парад кьиле фидайла, террористри авур гьужумрикди ислягь хейлин инсанар, аялар телеф хьуни виридаз терроризмдин алчах чин къалурна. Вахтар алатзаватIани, ихьтин мусибатар садрани рикIелай алатдач.
3-сентябрдиз Кьуругь райондин администрациядин актовый залда Кьурагьрин 1 ва 2-нумрайрин юкьван школайрин чIехи классрин аялрихъ галаз терроризмдиз акси женгина рейсадвилин йикъаз талукьарнавай гуьруьш кьиле фена. Абурун патав райондин кьилин заместителар тир Махач Хариев, Жаврудин Халикьов, райондин прокурор Фируза Лагъметова, РОВД-дин отделдин начальник Султан Къарибов, Кьурагьрин 1-нумрадин юкьван школадин директор Гьамид Мисриев, физкультурадинни спортдин ва жегьилрин крарин рекьяй отделдин начальник Рамиз Рамазанов, агъсакъалринни ветеранрин Советдин председатель Фахрудин Мирзоев ва хуьруьн агъсакъалар тир Али Алиев, Сиражудин Агьмедов, Мегьамедвили Амрагьов атанвай.
Мярекат Рамиз Рамазанова кьиле тухвана.
КIватI хьанвайбуруз Беслан шегьерда хьайи теракт ва КIирийрин хуьряй тир мешебеги, Россиядин Игит Зейнудин Батмановакай туькIуьрнавай кинофильмаяр къалурна.
Гуьгъуьнлай Ф.Лагъметовади, М.Хариева, Гь.Мисриева аялриз терроризм ва экстремизм негь ийидай суьгьбетар авуна.
М.Агьмедова
