Египетда ва шаркь патан маса уьлквейра хушракан-деве тIвар алай еке гьашарат ава. Яргъивилел 15 сантиметр алай адаз халисан хушракан  лугьуз жедач. Ам хушраканрин дестедик акатзавай сольпуга хьтин гьашарат я. Хушракан-деведиз Египетдин гигант ва я гарун акьрабни лугьузва. Ам гзаф зиринг я — са сятда 16 километрдиз чукуриз жеда.

Баябан къумлухра яшамиш жезвай абурун рекьвер мягькембур я — вири бедендин пуд паюникай са пай тешкилзава.

Акунар зегьле ракъурдайбур ятIани, вич зегьерлуди туш. Инсандиз ада кIасун хаталу туш, яни са артух зарар гудач. Бязи жуьрейри, чIигъа-чIигъ ийиз, шуькIуь ванер акъуд­да. Хушракан-деве йифен гьашарат я. Йикъан вахтунда ада, къванерин кIанерик, тIеквенра далдаламиш хьана, вичин уьмуьр секиндиз тухуда. Хушракандиз ухшар и гьашаратри гъвечIи кьифер, жуьреба-жуьре гьашаратар ва чпин тIем акакьдай вири затIар незва. Ихьтин еке гьашаратри гьатта чурчулрал, акьрабрал ва къушарин шарагрални гьужумда.

Гьазурайди — Куругъли Ферзалиев