Мукьвара Хасавюрт райондин Къурушрин хуьре рагьметлу имам, диндин машгьур деятель Мугьаммад-гьажи Хидирован хва — хафиздин (Къуръан тамамдиз хуралай чидай кас) дережа къачунвай Расул Хидиров тебрикуниз талукьарнавай мярекат кьиле фена. Ана Дагъустандин Муфтийдин заместитель Шамил Алиханова, Хасавюрт шегьердин имамрин советдин председатель Юсуф Мегьамедова, Махачкъаладай, Каспийскдай, Дербентдай, Кьиблепатан Дагъустандай ва республикадин хейлин маса пипIерай атанвай диндин векилри иштиракна.
Межлисдал рахайбуру къейд авурвал, Къуръан кIелунихъ ва ам хуралай чирунихъ еке метлеб ва и кардай Аллагьдин патай чIехи сувабар ава. Шамил Алиханова и кардин важиблувал къалурун патал мярекатдин иштиракчийрин фикирдиз Мугьаммад Пайгъамбардин гьадис гъана: “Квекай виридалайни хъсанбур Къуръан чирзавайбур ва и рекьяй авай чирвилер масабуруз гузвайбур я”.
Диндин межлисдин сергьятра аваз жегьил хафиздиз Гьуьрметдин чар, савкьатар ва пулдин пишкеш гана.
Къейд ийин хьи, Расулан буба Мугьаммад-гьажи Хидирова вичин вири уьмуьр мусурман диндиз бахшнай. Ам 2015-йисан 9-сентябрдиз мискIиндиз экуьнин кпIунал физвай чIавуз къанлуйри яна кьенай. Рагьметлу имамдин крар къе адан рухвайри, сухтайри давамарзава.
Агьмед Магьмудов
