Сулейман-Стальский райондин хуьруьн майишатдин ва суьрсетдин управленидин кьилин пешекар Играмудин Гьажибалаева чаз лагьайвал, алай вахтунда районда продукция гьасилунал хуьруьн майишатдин 27 кархана, 42 КФХ, 960-далай виниз арендаторар ва 20 агъзурдалай виниз куьмекчи майишатар (ЛПХ-яр) машгъул жезва.
— Районда продукция гьасилунин карда цIийи, кIвенкIвечи къайдаяр ишлемишзавай ксарни ава, — алава хъувуна Играмудин Гьажибалаева. — ИкI, мисал яз, Кьулан СтIалрин хуьряй тир Нарик Мегьамедрасулова вичин куьмекчи майишатда кьетIен жуьредин багъ кутунва, ада пуд бегьер санал вахчузва. Чи районда гьа жуьредин маса багъ авач.
Играмудин Гьажибалаевни галаз чун Кьулан СтIалдал Нарик Мегьамедрасулован багъдиз фена. Гьакъикъатдани, багъ кьетIен жуьреда кутунва.
Н.Мегьамедрасулов пешекар агроном-багъманчи туш, багъманчивилел рикI алай кас я. Багъдин майданни чIехиди туш — анжах 36 сотых.
Багъдин кьетIенвал квекай ибарат я? Сад лагьайди, тарар арайра лап тIимил мензил аваз цанва, са тарцин хилер маса тарце акIанва. ЧIехи пай ичин (Айдеред сортунин) тарар я. Багъда гьакIни шуьмягърин, шефтелийрин, чуьхверин тарарни ава. Тарарин кIанерик, къайдадик кваз цIарба-цIар цIирицIрин (смородина) къелемар, багъдин чиле некьияр цанва.
— За, стха, гьар йисуз жуван багъдай пуд бегьер санал кIватI хъийизва: ичер, чуьхверар, шефтелияр, шуьмягъар, гьакIни цIирицIарни некьияр, — лугьузва Нарик Мегьамедрасулова. — Хиве кьун лазим я хьи, и къайда регьятди туш. КIвалахда заз жуван хизанди куьмекар гузва. Зегьметди арадал гъайи бегьер акурла, хизандиз къазанжини хьайила, жафаяр, четинвилер рикIелай алатзава.
Нарик Сиязидинович, гьакъикъатдани, чилин къадир авай, зегьметдал рикI алай, лугьудайвал, гъилералди къазанмишай гьалалдин фу незвай кас я. ЦIийи жуьредин багъ арадал гъана саки 20 йис я. Идалайни гъейри, Н.Мегьамедрасуловахъ гъвечIи къелемлухни ава.
Н. Мегьамедрасулова чаз лагьайвал, 36 сотыхдин участокдай ада гьар йисуз 12-15 тонн ичер, 400-500 килограмм некьияр, 1 тонндилай виниз цIирицIар кIватI хъийизва.
Гьасилай бегьерни ада гьа чкадал маса гузва. Ада вичи лугьузвайвал, экологиядин жигьетдай михьи продукциядиз муьштерияр гзаф ава, абур неинки чи райондай, гьакIни Дербентдай, масанрайни къвезва.
Ваз къуватар хьурай, намуслудаказ зегьмет чIугвазвай, халкьдин суфра берекатлу ийизвай гьурметлу Нарик Сиязидинович!
Хазран Кьасумов
