14-сентябрдиз Докъузпара райондин администрациядин заседанийрин залда райондин кьил Абдурагьим Алискерован иштираквал аваз райондин депутатрин Собранидин 30-сессия кьиле фена.

Сессия райондин депутатрин Собранидин председатель Агьмед Агьмедова ачухна ва кьиле тухвана.

Ада райондин Каракуьре ва Цlийи Каракуьре хуьрерин патай райондин Собранидин депутатрин депутатвилин муддат куьтягь хьанвайдакай ва цlийиз хкянавай депутатар составдик кутунин чарасузвиликай лагьана.

Сессиядал 2018-йисан райондин бюджетда хьанвай дегишвилерикай райондин финансрин управленидин начальникдин заместитель Нурмегьамед Гъафурова ихтилатна. Ада къейд авурвал, арадал атанвай дегишвилер Каракуьре ва Къалажух хуьрерин мектебар цlийи хъувунихъ галаз алакъалу я. Малум тирвал, и кьве мектеб республикадин «100 мектеб» программадик кутунва.

Сессиядал «Самурский» милли парк арадал гъуниз талукь яз хуьрера хьайи сходрин нетижаярни малумарна. Кьилди къачуртlа, хуьрера и месэладин гьакъиндай яб акалунар, сходар кьиле фейи вахтунда халкьди милли парк арадал гъуниз талукь месэладиз чпин наразивал къалурна. Жемятдин наразивилерихъ галаз алакъалу яз, райондин администрацияди «ВНИИ Экология» ФГБУ-дин теклиф кьабул тавун кьетlна. И месэла Агьмед Агьмедова депутатрин виликни эцигна.

Сессиядал веревирд авур пуд месэладин гьакъиндайни рейсадвилелди сесер гуналди, абур тестикьарунин къарар кьабулна.

Малум хьайивал, райондин депутатрин Собранидин председатель А.Агьмедов кlвалахалай элячlзава. Депутатриз цlийи председатель хкягъун теклифна ва виридан теклифрихъ, тlалабунрихъ яб акалайдалай кьулухъ, райондин депутатрин Собранидин председателвиле Абас Абасов тайинарунин гьакъиндай къарар кьабулна.

Райондин кьил Абдурагьим Алискерова, Агьмед Агьмедова ва вири депутатри Абас Абасоваз цlийи къуллугъ тебрикна. Вичин нубатда А. Абасова жавабдар къуллугъ вичел ихтибар авунай чухсагъул малумарна.

«Лезги газет»