14-сентябрдиз Докъузпара райондин центрада кардик квай медениятдин кlвале, Дагъустандин халкьарин садвилин йикъан сергьятра аваз, 8-сеферда яз «Манияр лугьузвай симер» республикадин фестиваль кьиле фена.

Кьиблепатан Дагъустандин халкьарин меденият хуьнин, музыка вилик тухунин макьсаддалди гьар йисуз Усугъчай хуьре кьиле тухузвай мярекатдин тешкилатчияр Докъузпара райондин администрация, РД-дин Медениятдин министерство ва Республикадин халкьарин яратмишунрин Кlвал я.

Докъузпарадин медениятдин управлениди хуьрерин администрацийрин куьмекдалди медениятдин ирс ва халкьдин яратмишунар хуьнин, раиж авунин карда хейлин кlвалахар кьилиз акъудзава.

Авазринни манийрин мярекатда Кьиблепатан Дагъустандин ВИА-ри, ашукьри, кьилдин манидарри иштиракзава. Кьилди къачуртlа, цlинин йисуз фестивалда Докъузпара, Ахцегь, Кьурагь, Мегьарамдхуьруьн, Рутул, Табасаран районрин ансамблри, ВИА-рин манидарри, ашукьри ва музыкадин устадри иштиракна.

Фестиваль башламишдалди вилик райондин кьилин заместитель Салигь Гьажимурадова манидарар, музыкантар тебрикна ва яратмишунра агалкьунар хьун алхишна.

Яб акалзавайбурун гуьгьуьлар шадаруналди, Рустам Рамазанова, Салбина Тагъиевади, Гьуьрият Мегьамедовади, Низакет Абдуселимовади, Шафи Ибрагьимова Дагъустандин шаирри дуствилин, садвилин ва ватандихъ авай кlанивилин темайриз бахшнавай чlалариз кхьенвай манияр тамамарна.

Фестивалдин эхирдай вири иштиракчийриз Докъузпара райондин кьил Абдурагьим Алискерован патай грамотаяр ва къиметлу савкьатар гана.

Куругъли Ферзалиев