7-сентябрдиз Мегьарамдхуьруьн райондин Самур хуьре цин турбаяр тухунин кIвалахрал чан хкуниз акси экъечIзавай чкадин жемятдин кIватI хьун (сход) кьиле фена. Иштиракчийрин кьадар пуд вишев агакьзавай. Абурун арада Самур хуьруьн администрациядин кьил Фазил Тагьирмирзоевни авай. Ада къейд авурвал, яд тухунин кIвалахар РД-дин Гьукуматдин Председатель Артем Здунован тапшуругъдалди давамарзава ва абурун макьсад и карди Самурдин тамуз гун мумкин тир зиян ахтармишуникай ибарат я.
Чкадин агьалийри чеб и кардиз акси тирдакай хабар гана. Самур хуьруьн собранидин депутат Р.Шагьпазован гафарай, вири депутатри халкьдин тереф хуьзва ва яд тухунин нетижаяр виликамаз тайинариз хьун мумкин кар туш.
Мярекатдин сергьятра аваз чпин фикирар са шумуд иштиракчиди лагьана. Гуьгъуьнлай кьабулай къарарда, кьилди къачуртIа, къейднава:
1. Пудратчи карханади лазим тир вири документар къалурдалди водозабор эцигунихъ галаз алакъалу вири кIвалахар акъвазарин;
2. Эгер пудратчи карханади документар къалурайтIа, абуру кьиле тухудай кIвалахрал гуьзчивал авун патал хуьруьн администрацияда регистрация авунвай махсус десте (инициативная группа) тайинарин;
3.Водозабордихъ галаз алакъалу месэла вервирд авун патал хуьруьн агьалийрикай Дагъустандин Кьил Владимир Васильевахъ галаз гуьруьшдиз фидай делегация хкягъин.
Чкадин агьалийрикай ибарат махсус дестеди Самур хуьруьн администрациядин кьил Фазил Тагьирмирзоевахъ, Мегьамед-Гьанифа Бейбутовахъ ва хуьруьн собранидин маса депутатрихъ галаз санал 7-сентябрдиз кьиле фейи кIватI хьунин протокол Самур-Дербент водоводдин турбаяр тухунал машгъул жезвай Фирма «Диоген» ООО пудратчи карханадиз регьбервал гузвай Эмирбег Амахановав вахкана. Ада ам кIелна ва къулни чIугуна. Чкадин агьалийри Э.Амахановавай пудратчи карханади кIвалахар квел бинеламиш хьана кьиле тухузвайди ятIа хабар кьуна. Амаханован гафаралди, карханади РФ-дин Президент Владимир Путинан тапшуругъ кьилиз акъудзава. Адавай карханадихъ мониторинг тухудай ихтияр авани, буругъдин кIвалахар кьиле тухудай лицензия гвани лагьана жузурла, самурвийрив тамам жаваб агакьнач. Гуьгъуьнлай Э.Амаханова вичин чIехибуруз зенг авуна ва арадал атанвай гьаларикай хабар гана.
Нетижада, 7-сентябрдиз кьабулай къарардин 1-пунктунал асаслу яз, кIвалахар акъвазарна. Абур арадал атанвай гьуьжетдай кьил акъудун патал прокуратурадиз фидай меслятдал атана. Вакъиаяр гуьгъуьнлай гьикI давам хьанатIа, чаз гьелелиг малум туш.
Самурвийри къейдзавайвал, эцигунарзавай карханадин гьерекатар къанундиз аксибур я. Абуру и месэладин патахъай РФ-дин Генеральный прокуратурадизни тIебиатдин ресурсринни экологиядин Министерстводиз чарар рекье тунва.
Агьмед Магьмудов
