Владимир Васильев Дагъустандин Кьилин къуллугъдал хкяна
РД-дин Халкьдин Собранидин депутатри, чинеба сесер гуналди, 69 йисан яшда авай Владимир Васильев Дагъустандин Кьилин къуллугъдал хкяна.
“Депутатрин кьадар 90 кас я, бюллетенар къачуна 86-да. Сесер гана: В.Васильеваз — 77 сес”, — сесер гунин нетижаяр Счетный комиссиядин председатель Фикрет Ражабова раижна. Республикадин Халкьдин Собранидин Председатель Хизри Шихсаидова Владимир Васильев, гьа икI, республикадин Кьилин къуллугъдал хкянавайдан гьакъиндай малумарна.
2018-йисан 17-августдиз РФ-дин Президентди региондин кьилин къуллугъдал хкядайвал Дагъустандин Халкьдин Собрание килигун патал Владимир Васильеван, гьакIни РД-дин Халкьдин Собранидин Председателдин заместителар тир Камил Давдиеван ва Магьмуд Магьмудован кандидатураяр теклифнай.
Камил Давдиеваз 5 депутатди, Магьмуд Магьмудоваз 4 парламентарийди чпин сесер гана.
Региональный законодательстводал асаслу яз, Дагъустандин Кьил, Госдумада ва республикадин Халкьдин Собранида векилвалзавай партийри къалуруналди, государстводин Кьили теклифнавай кандидатурайрин жергедай республикадин парламентдин депутатри хкязавайди я. РФ-дин Президентди, сесер гудалди 20 йикъалай тIимил тушиз вахт амаз, вичиз къалурнавай кандидатурайрикай региондин руководителдин къуллугъдал хкягъун патал Законодательный собранидиз пуд кандидатура теклифзавайди я.
“КIвалахдин рекьяй зи юлдашри кьиле фейи гуьруьшрин вахтунда, чпин рахунра кар алай месэлаяр тайинарна. Зун инанмиш тирвал, чавай, сада-садаз куьмек гуналди, месэлаяр гьялиз жеда. Зун куьне авунвай виниз тир ихтибар гьахъдиз акъудиз, республикадин агьалийрин яшайиш хъсанариз алахъда”, — лагьана Владимир Васильева вич хкягъайдалай гуьгъуьниз депутатрин вилик рахадай чIавуз.
Къуллугъдив эгечIун
Вич хкягъайдалай гуьгъуьниз Владимир Васильев Дагъустан Республикадин Кьилин къуллугъдив эгечIна.
“РФ-дин Конституциядал асаслу яз, Васильев Владимир Абдуалиевич Дагъустан Республикадин Кьилин къуллугъдив эгечIнава”, — лагьана региондин Халкьдин Собранидин сессия кьиле физвай чIавуз Дагъустандин Конституционный суддин председатель Мегьамед Халитова.
Къуллугъдив эгечIайдалай кьулухъ В.Васильева кьин кьуна. “За гзаф миллетрин векилрикай ибарат Дагъустандин халкьдиз вафалудаказ къуллугъда, РФ-дин Конституциядал, федеральный законрал, Дагъустандин Конституциядал, Дагъустан Республикадин законрал амалда, инсандин ихтиярриз гьуьрметда ва абур хуьда лагьана кьин кьазва”, — малумарна В.Васильева.
Региондин парламентдин Председатель Хизри Шихсаидова ихьтин алавани хъувуна: “Дагъустандин Халкьдин Собраниди Васильев Владимир Абдуалиевич Дагъустандин Кьилин къуллугъдал 5 йисан вахтуналди хкягъун къарардиз къачунва”.
Васильеван гьакъиндай
Алай йисан августдиз Владимир Васильеван 69 йис тамам хьана. Ам Подмосковьеда авай Клин шегьерда дидедиз хьана. 1972-йисуз ада Москвада СССР-дин МВД-дин милициядин махсус юкьван школа, 1978-йисуз Вирисоюздин юридический заочный институт, 1991-йисуз СССР-дин МВД-дин Академия куьтягьна. Ам юридический илимрин кандидат я.
1972-йисалай ада къенепатан крарин органра кIвалахна, 1997-йисуз адакай РФ-дин къенепатан крарин министрдин заместитель — тешкиллу тахсиркарвилерихъ галаз женг чIугунин рекьяй Кьилин управленидин начальник хьана. 1999-2001-йисара ам РФ-дин Хатасузвилин советдин секретардин заместитель, 2001-йисан мартдилай РФ-дин МВД-дин статс-секретарь — кьилин заместитель тир. 2002-йисан октябрдиз ада Дубровкада Театральный центр террористри кьунихъ галаз алакъалу яз тешкилай милициядин штабдиз регьбервал гана. Адахъ полициядин генерал-полковникдин чин ава.
2003-йисан 7-декабрдиз ам Твердин са мандатдин 173-нумрадин сечкидин округдай (Твердин область) РФ-дин кьуд лагьай созывдин Государстводин Думадин депутатвиле хкяна. Ам “Сад тир Россия” фракциядик акатна. 2004-йисан январдиз ам Госдумадин хатасузвилин рекьяй комитетдин кьиле акъвазна. 2007, 2011 ва 2016-йисара ам Госдумадиз хкя хъувуна. 2012-йисуз В.Васильев парламентдин агъа палатада “Сад тир Россия” фракциядин кьиле акъвазна ва Госдумадин Председателдин заместителдин къуллугъдал хьана. 2017-йисан 3-октябрдиз, республикадиз 2013-йисалай регьбервал гайи Рамазан Абдулатипов отставкадиз фейидалай гуьгъуьниз Россиядин Президент Владимир Путина В.Васильев Дагъустандин Кьилин везифаяр вахтуналди тамамарзавайди яз тайинарна. В.Васильев къуллугъдал тайинарайдалай гуьгъуьниз са тIимил вахт алатайла, республикада коррупциядиз акси чIехи женг башламиш хьана: Дагъустандин Гьукуматдин кьилин везифаяр вахтуналди тамамарзавай Абдусамад Гьамидовни кваз, чIехи къуллугърал алай са шумуд чиновник, гьакIни Махачкъаладин мэр Муса Мусаев кьуна.
Чи мухбир
