Алай вахтунда США-дин камаллу алимрин жергеда авай  Видади  Юсибован  ватан Азербайжан республикадин Къебеле райондин Эмирван тlвар алай лезги хуьр я.

Видади Юсибов США-да яшамиш жезва, ам анин ватандаш я. Гъурбатда ава­тlани, ам 1999-йисалай инихъ гьар йисуз Азербайжандиз, вичин хайи хуьруьз хквезва, гагь-гагь Россиядани жезва. Алимди Бакуда, Москвада ва маса шегьерра илимдин жуьреба-жуьре конференцийрал лекцияр кlел­зава.

2007-йисуз кьве миллиондилайни гзаф тираж авай машгьур “Esquire” журналда лезги алимдин интервью чапдай акъатна. Гуьгъуьнлай ам США-дин виридалайни акьуллу 10 касдин жергеда гьатна. Кьилди къачуртlа, В.Юсибова ма­лу­марзавайвал, адан теш­килатди ракдин азардиз акси дар­­манар арадал гъизва. Журналда алим гзаф камаллу кас тирди къейднава. Ада регьбервал гузвай Фраунхофердин центради Сибирдин язва азардихъ галаз лап хъсан тегьерда женг чlугвазвайдакай малумарзава.

Алимди тестикьарзавайвал, инсаниятди набататриз, трансгенный технологийрин мумкинвилериз са артух къимет гузвач.

В.Юсибова сифтедай Азер­байжандин госуниверситетдин биологиядин факультет, 1984-йисуз Ленинграддин университет тафаватлудаказ куьтягьна. Вуз куьтягьайдалай кьулухъ адаз Азербайжандиз хтун теклифна ва ана илимрин милли академиядин биотехнологический группада вичин кlвалах башламишна. Азербайжанда машгьур алим Жалал Алиеван регьбервилик кваз кlвалахун себеб яз, В.Юсибов СССР-дин меркездиз акъатна. Жегьил алимдихъ авай акьул, алакьунар акурла, Ж.Алиева ам трансгенный цlийи технологийрин хиле чирвилер къачун патал СССР-дин тежрибалу пешекаррин патав рекье туна. Гьа икl, В. Юсибов цlийи хел чирай СССР-дин сифте алимрикай сад хьана.

1989-йисуз В.Юсибова Москвада “Экспрессия генов в трансгенных растениях” темадай диссертация хвена. СССР чкlайдалай кьулухъ алимдиз США-диз теклифна. Ина са кьадар йисарилай адакай Пенсильвания штатда авай Томас Джефферсонан машгьур университетдин къуллугъчи хьана. 2001-йисалай ада цlийи дарманар арадал гъунин карда машгьур хьанвай Фраунхофердин молекулярный биотехнологиядин центрада илимдин къуллугъчи яз кlва­лахна ва са кьадар йисарилай адакай и центрадин генеральный директор хьана. В.Юсибова регьбервал гузвай центрадихъ хейлин агалкьунар ава. Чlехи къул­лугъ­дал алатlа­ни, ада дарманар арадал гъунин кардани иш­тиракзава. Ада арадал гъайи дарманрикай надирди къушарин гриппдиз акси вакцина  я.

Америкада машгьур чи ватанэгьлидихъ къуй мадни зурба агалкьунар хьурай.

Куругъли Ферзалиев