Асуллу Усман ибн Аффан Мединадиз куьч хьайидалай кьулухъ адаз анин агьалияр цин па­та­хъай кIевера гьатзавайди акуна. Мединадин вири къуйра туькьуьл ва уьцIуь яд авай тир. Ан­жах са чу­вуддин къуйда авай яд хъваз жедайди ва дадуниз хъсанди тир. Цихъ тамарзу хьанвай инсанриз и къуйда авай яд чувудди пулдихъ­ маса гузвай. Ам­ма кесиб инсанриз гзаф четин жезвай. И вахтунда Ал­лагьдин Расул­ди  уьмметдихъ элкъвена лагьана:

— Женнетда авай идалайни хъсан булахдиз ла­йихлу хьун патал Румадин къуй, ана авай цел гьалтайла, вири мусурманриз сад хьтин ихтиярар хьунин шартIуналди  низ, пулдихъ маса къачуз кIанза­ва?

Яни и къуй маса къачур касди яд амай мусурманрихъ галаз барабар ихтиярралди ишлемишна кIанзавай. Асуллу Усман асгьабдиз геж тавуна, а къуй къачуз кIан хьана. Амма чувудди адан теклиф­ кьабулнач. Эхирни Усманалай а къуйдин са пай къачуз алакьна. Гила мусур­манривай, югъ арадай ахъайиз, къуйда авай яд пулсуздаказ ишлеми­шиз жезвай. Чувуддин югъ атай­­ла, адан патав яд тухуз­ садни къвезвачир. Усманан югъ атайла, инсанри пулсуздаказ къуйдай яд тухузвай. Вичин къуй­ди­кай къазанжи къачуз техжез, чара атIай чувудди къуйдин амай пайни  Усман асгьабдиз маса хгана.

Аллагьдин Расулди  Асуллу Усманавай жузуна:

— Инсанар целди таъмин жедайвал, вуна абуруз и къуй багъишзавани?

Ада Пайгъамбардин  теклиф кьабулна ва мусурманриз къуй пишкешна.

Гьа и жуьреда, Усманан регьим ва жумартвал себеб яз, Мединадин мусурманар цихъ галаз алакъалу четинвиликай азад хьана. Усман асгьабди къуй инсанриз пишкеш авуналди, вичиз женнетда Пайгъамбарди  лагьай хъсан булах къазанмишна. Къуй Асуллу Усманалай Аллагь рази хьурай.

Вичи маса къачур ва инсанрин игьтияжар патал къурбанд авур къуйдай яд къачузвай инсанрин нубатда Усман вични акъваздай. Гьа икI, ада вичин дамах гвачирвал къалурзавай.

Али Эмирсултанов