Расул Гьамзатов 1923-йисуз Хунзах райондин ЦIада хуьре Дагъустандин халкьдин шаир ЦIадаса Гьамзатан хизанда дидедиз хьана. Ватандин ЧIехи дяведин йисара Расула сифтегьан шиирар кхьиз башламишна. Ада Буйнакск шегьердин муаллимар гьазурдай училищеда, гуьгъуьнлай Москвада М.Горькийдин тIварунихъ галай Литературный институтда кIелна. 1948-йисалай уьмуьрдин эхиримжи йикъаралди Расул Гьамзатова Дагъустандин писателрин Союздин правленидин председатель яз кIвалахна. Ада и тешкилатдиз регьбервал гузвай йисара Дагъустандин эдебиятдиз чIалан бажарагълу устадрин десте атана. Абурун жергеда Алирза Саидован, Фазу Алиевадин, Газимбег Багандован, Мегьамед Атабаеван ва цIудралди масабурун тIварар раиж хьана.
Бажарагълу ва камаллу шаир Расул Гьамзатован яратмишунар кьве сеферда Сталинан премийриз лайихлу хьана. “Кьакьан гъетер” ктабдай адан лайихлувилер Ленинан премиядалди къейдна. Советрин эдебиятда къазанмишай агалкьунриз килигна, Расул Гьамзатович Гьамзатоваз 1973-йисуз Социализмдин Зегьметдин Игит лагьай чIехи тIвар гана. Адан яратмишунриз халкьарин арада дуствал мягькемарунин, ислягьвал хуьнин, муьгьуьббатдиз вафалу хьунин, намуслувилин ва зегьметкешвилин гьиссер хас я.
Расул Гьамзатован “Дурнайрикай” къе дуьньядин халкьарин мани хьанва. Дагъустандин тIвар кьадайла, Расул Гьамзатован тIвар рикIел гъизва.
Советрин девирдин машгьур шаир ва литературовед Сергей Наровчатова икI кхьенай: “Эгер цIуд хъсан, бажарагълу шаирдин тIварар яхъ лагьанайтIа, за лугьудай: “Ва Расул Гьамзатов”. Рекъем тIимиларна, пудал авуднайтIа, мадни тикрардай: “Ва Расул Гьамзатов”. “Са шаирдин тIвар яхъ лагьанайтIани, за хълагьдай: “…Расул Гьамзатов”. Гьакъикъатдал гьалтайлани, гьакI яз амукьзава: Расул Гьамзатов дуьньядин майдандин шаир я.
Шагьбала Шагьабалаев, шаир
