«Куьредин хабарар» газетдин — 95 йис
Акъатиз башламишай 1931-йисалай инихъ СтIал Сулейманан райондин жемиятдинни сиясатдин «Куьредин хабарар» газетдин кьилин редакторвиле гзафбуру зегьмет чIугуна. Алай вахтунда кIвалахзавай Мирзалиева Асият Мусаевна 15 лагьайди я. Адалай вилик и жавабдар везифаяр кьиле тухвай гьар сада газетдин тарихда тайин гел туна. Яргъал йисара кIвалахайбурукай сад Муталибов Сейфудин Мегьамедович я. Вичикай рахадайла, инсан, журналист, регьбер гафар чIехи гьарфунилай кхьиниз лайихлу Сейфудин Мегьамедович Муталибов къе чна еке гьуьрметдивди рикIел хкизва.
…РикIел алама: 1983-йисуз Кьасумхуьрел кьиле фейи хуьрерин мухбиррин совещанидал СССР-дин журналистрин союздин член, КПСС-дин СтIал Сулейманан райкомдин 1-секретарь Ибадуллагь Гьажимирзоевич Тагьирова лагьанай: «Сейфудин Мегьамедович бажарагълу, анжах са вичиз хас хатI авай журналист я». Завай и келимаяр тестикьариз жеда, гьикI лагьайтIа, сифтедай хуьруьн мухбир яз, гуьгъуьнлай 12 йисуз адахъ галаз газетдин редакцияда санал кIвалахуналди, заз Сейфудин Мегьамедович фадлай ва лап хъсандиз таниш тир.
С.М. Муталибов гьеле чан аламаз инсанрин рикIера вичиз гуьмбет эцигай кас я. Адаз инсанвал, намуслувал, бегьерлудаказ зегьмет чIугун, вини дережадин къанажагълувал, руьгьдин михьивал ва ихьтин маса ерияр хас тир.
С.М. Муталибов 1934-йисуз Агъа СтIалдал марифатлу хизанда дидедиз хьана. Ада юкьван школа, Дагъустандин госпединститут акьалтIарна.
1957-1959-йисара ада республикадин «Коммунист» газетдин литработниквиле, 1959-йисан сентябрдилай 1960-йисан августдалди ДАССР-дин Министррин Советда соцкультгруппадин консультантвиле, 1960-1965-йисара Азербайжандин М. Алиеван тIварунихъ галай театральный институтдин культпросветдин кIвалахрин кабинетдин заведующийвиле кIвалахна.
Сейфудин Мегьамедовича ДАССР-дин культурадин министерствода инспектордин, гуьгъуьнин 3 йисуз Мегьарамдхуьруьн райондин Советский хуьруьн юкьван школадин директорвилин везифаяр тамамарна.
1971-1972-йисара ДГУ-да аспирантурада кIелай С.М. Муталибовакай гуьгъуьнин 2 йисуз Дагъустандин «Знание» обществода референт хьана.
1974-йисалай ам вичин рикI алай журналиствилин кIвалахдал тамамвилелди элячIна. 1982-йисалди адакай «Коммунист» газетдин партотделдин заведующий ва хсуси корреспондент хьана.
1982-йисуз С. Муталибов райондин «Коммунизмдин гатфар» (гилан «Куьредин хабарар») газетдин редакторвиле тайинарна. И везифаяр ада 2001-йисалди намуслудаказ кьилиз акъудна.
РФ-дин журналистрин союздин член, Дагъустандин культурадин лайихлу къуллугъчи С. Муталибова регьбервал гайи йисара газетдин кIвалахда хъсан патахъ еке дегишвилер кьиле фена. Газетдикай гьакъикъатдани райондин гуьзгуь, чархачи хьана. Сифте нубатда ада вич кьетIен хатI авай журналист тирди къалурна: метлеблу макъалаяр, очеркар, репортажар кхьена. Ада «Чигали» лакIаб алаз кхьей критикадин макъалайри, фельетонри «ван ийидай». Сейфудин Мегьамедович истемишунардай, гьахъвал гвай редактор-регьбер тир.
Журналиствилин рекье Сейфудин Мегьамедович за жуван муаллим яз гьисабзава. Адан меслятри, насигьатри ва истемишунри зун и пешедал мадни ашукьарна, виликди финиз куьмекна.
Уьмуьрда гьуьрметни, туьгьметни къазанмишзавайди гьар са кас вич я. Сейфудин Мегьамедовичаз, гьар гьина хьанатIани, вичин чка, дережа чир хьайиди я. Къуллугърихъ, тIварарихъ, девлетрихъ ам садрани калтугнач. Гьакъикъатдани, уьмуьрда девлетрихъ, пуларихъ маса къачуз тежер шейэр ава. Абурукай сад несилриз тазвай тIвар, и тIварцIихъ галаз алакъалу инсанвилин кьакьан дережаяр я. И келимаяр Сейфудин Мегьамедовича редакциядин работникриз мукьвал-мукьвал эзбердай.
Бажарагълу журналист, коллективда гьуьрметзавай регьбер хьиз, С. Муталибов инсанперес, мугьманперес ва камаллу суьгьбетчини тир. Ада ийизвай ихтилатдив кьадай насигьатлу мисалар уьмуьрдай гъидай, маракьлу, хъуьруьн-зарафат квай къаравилияр ахъайдай. Чебни – гаф атай, кутугнавай чкадал. Ихьтин макъамра абурун таъсирлувал мадни артух тир.
– Райондин газетдин редактор хьайи йисара Сейфудин Мегьамедовича редакциядиз гьа и рекьяй алакьунар авай жегьилар желбна, – лугьузва газетдин кьилин редактор Асият Мирзалиевади. – Абурукай яз, завай отделрин заведующияр хьайи Тариверди Мусаеван, Ягьия Мегьамедкьасумован, Осман Османован, Али Алиеван, Хазран Кьасумован тIварар кьаз жеда. Зунни редакциядиз кIвалахал хкайди Сейфудин Мегьамедович я. Къени инсан, хъсан редактор, чIехи дережадин журналист тир. Женнет кьисмет хьурай вичиз!
С. Муталибов 2021-йисан 31-декабрдиз 87 йисан яшда аваз рагьметдиз фена. «Куьредин хабарар» газетдин редакциядин коллективди ада тунвай ирс хуьзва ва давамарзава. «Бахтлу кас вичин тIвар несилри рикIера хуьзвайди я», – лагьанай Алишер Навоиди. Са рахунни алачиз, гьа ихьтин инсанрик Сейфудин Мегьамедовични акатзава.
Хазран Кьасумов
