Махсус серенжемдикай

6-июлдиз РФ-дин Яракьлу Къуватри яргъаз ядай дуьм-дуьз яракьрин куьмекдалди Украинадин кьушунрин военный аэрод­ромрин къурулушриз, военный промышленностдин карханайриз, энергетикадинни кудай затIарин объектриз гегьенш ягъунар кьуна. Идакай РФ-дин оборонадин «МАКС» каналди хабар ганва.

6-июлдин йифен вахтунда ВСУ-ди яргъал мензилдиз фидай 625 беспилотникдин куьмекдалди СВО кьиле физвай мулкара авачир Россиядин объектриз еке гьужумар авунин ала­хъу­нарна.

Къейдзавайвал, пилот галачиз лув гудай аппаратрикай 613 тергна. «7-8-июлдиз жедай саммитдин вилик В. Зеленскийди фикирдиз къачур гегьенш гьужумар кьилиз акъатнач, беспилотникар лагьайтIа, яна ва кукIварна», – кхьенва малуматда.

6-июлдин нянин вахтунилай 7-июлдин экуьнин сятдин 8-далди РФ-дин ПВО-дин такьатрин куьмекдалди Украинадин 452 беспилотник тергна. Абур мидяди чи уьлкведин хейлин регионрал ахъайнавай.

Оборонадин министерстводи 6-июлдиз малумарай делилралди, СВО кьиле тухунив эгечIайдалай инихъ Россиядин Яракьлу Къуватри Украинадин 673 самолет ва 284 вертолет, зенитный ракетайрин 664 комплекс, пилот галачиз лув гудай 175 506 аппарат, 30 048 танк ва дяведин маса машинар, РСЗО-дин 1754 машин, артиллериядин ва маса 35 666 яракь, военный махсус 65 761 автомашин тергна.

Сир ахъайна

Польшадин оборонадин министр В. Косиняк-Камыша 2022- йисалай инихъ уьлкведи Украинадиз гайи са кьадар­ яракь­рикай ихтилатна. Идакай «РИА Новости» чешмеди хабар ­гузва.

«Гзафни-гзаф 2022-2023-йисара куьмек гана. Санлай абурун къимет 15 миллиард злотый (Польшадин пул) я», – лагьана ада.

Адан гафаралди, Киевдиз Т-72, РТ-91, «Леопард» танкар, бронетранспортерар, ракетайрин установкаяр, минометар, беспилотникар, Миг-29 самолетар, Ми-24 вертолетар, ПВО-дин комплексар, артиллериядинни танкарин суьрсетар ва хейлин маса яракьар ракъурна.

Польшадин алай вахтунин гьукуматди 2024-2026-йисара «Patriot» ЗРК-дин яракьар, ракетайрин къурулушар, идара ­ийидай бомбаяр, гранатометдиз талукь суьрсетар, авиациядин техникадиз талукь аппаратура ва запчастар, ПВО-дин техника патал радарар, артиллериядинни танкарин боеприпасар Украинадиз рекье туна. Санлай къачурла, абурун умуми къимет 412 миллион доллардив агакьнава. «Чна гележегдани ­куьмек гуда. Гьелбетда, хейлин тIимил. Вучиз лагьайтIа, гуз жедай кьван затIар чна ганва», – алава хъувуна Косиняк-Камыша.

Идалай вилик сеймдин вице-спикер К. Босака малумарайвал, гьукуматди украинвийриз чинеба «Patriot» патал ракетаяр гана, гьакъикъатда а ракетаяр Польшадин хсуси игьтияжар патал хуьзвайбур тир. Ада депутатриз, парламентдин разивал авачиз, къецепатан уьлквейриз яракьар маса гунал къадагъа эцигунин къанун кьабулуниз эвер гана.

Москвади гьисабзавайвал, Киевдиз яракьар ракъуруни НАТО-дин уьлквеяр ачухдаказ къалмакъалдик кутазва. Чи уьл­кведин гьукумдарри ихьтин жуьредин парар Россия патал къанундалди тергдай макьсадриз элкъвезвайдакай са шумудра лагьанай. Кремлди малумарзавайвал, Украина яракьривди ацIу­руни къалмакъал эхирдал гъуниз таъсирдач, акси яз, ихьтин гьерекатри гьалар мадни къизгъинарзава.

Гьелягьар кьаз хьайитIа…

Ирандин къецепатан крарин министр А.Аракчиди малумарайвал, эгер Вашингтонди гьелягьар кьун давамариз хьайитIа, эхиримжи икьрар кутIунунин патахъай рахунар башламиш жедач. Идакай «РИА Новости» чешмеди хабар гузва.

«Миллионралди такабурлу иранвияр чIехи аятолла Хаменеи ва адан ирс рикIел хкун патал кIватI хьана. Я гьабурузни, я чи жуьрэтлу яракьлу къуватризни кичIерар гуни таъсирдач. Меслятдал атунин меморандумдин 13 лагьай параграфди ачухдиз къалурзава: эгер гьелягьар кьун давам жез хьайитIа, эхиримжи икьрар кутIунунин патахъай рахунар гатIундач. Жуван къулуниз гьуьрмет ая», – кхьенва иранви министрди «Х» соцсетда.

Наразивал малумарна

 Азербайжанди Россиядин векил Михаил Евдокимоваз уьл­кведин МИД-диз эвер гана ва Украинадин Николаевский областда авай SOCAR-дин (АР-дин государстводин нафтIадин тешкилат) объектдиз ягъунар кьунай наразивал малумарна. Идакай «Лента.ру» чешмеди хабар гузва.

«Гуьруьшдин вахтунда Азербайжандин терефди 5-июлдиз­ SOCAR-дин АЗС-дал беспилотникдин куьмекдалди гьужум авуникди кьетIи наразивал малумарнава», – хабар гузва АР-дин МИД-ди.

«Лезги газет»