Дармандин набататар
Нарат тар (адаз шамагъажни лугьуда) течидай кас бажагьат ава. Пешекаррин гафаралди, нарат къум квай накьвада хъсандиз экъечIда, гьакIни ам батахлух чкайра гьалтзава.
Гзаф набататрикай хьиз, нарат тарцикайни дармандин такьатдин еринда менфят къачуз жезва. Шамагъаждин тIурар дезинфекция ийидай хъсан такьат яз гьисабзава. Тарцин тIурар гатфарин эвел кьиле, абур гегьеншдиз ахъа хьайила, дакIвадай гьалда авайла, кIватIзава. КIватIай тIурар, кьелечI къатуна аваз экIяна, серин ва шагьвар авай чкада 3-4 гьафтеда кьурурун теклифзава. Эгер тIурар гзаф чимивал авай чкада кьурурайтIа, абурук квай шкьакь хкатда.
Пешекарри къейдзавайвал, шамагъаждин тIурарик эфирдин чIем, крахмал, минеральный кьел ва С витамин ква. Бронхит авайлани, ингаляция ийидайлани тарцин тIурарин гьалимадикай ва я абур кваз гьазурнавай цикай менфят хкудиз жезва. Рахит, визи (золотуха) азаррин аксинани ишлемишзава.
Набатат дармандин такьат яз ишлемишдалди вилик пешекарривай меслятар къачун, ишлемишунин къайдайрикайни къадагъайрикай галай-галайвал малуматар чирун рикIелай ракъурна виже къведач.
«Лезги газет»
