Дагъустандин Кьилин везифаяр вахтуналди тамамарзавай Федор Щукина 21-июндиз Мегьарамдхуьруьн райондин Гъепцегьрин хуьре мемориальный комплекс ачухуниз талукь мярекатда иштиракна. Ина емишрин 100 къелем цанва ва абур игитрин тIварарихъ янава. Къвалав аваданламишнавай сквер гва, ана беседкаяр, куьсруьяр эцигнава, ам хъсандиз экуь авунва.
Сквердин юкьва Жуьрэтлувилин кьве ордендин сагьиб Руслан Примован къамат шикилда туна къалурзавай монумент ава. Россиядин офицерди неинки вичин женгинин везифаяр тамамарзавай, ада гьакI ислягь инсанрин гьакъиндайни къайгъу чIугвазвай, кIеве авайбуруз гьар са рекьяй куьмек гузвай. 2023-йисуз юлдашар къутармишдайла ам телеф хьана. ЦIийи памятник вири ветеранриз, Ватан хуьзвай аскерриз бахшнава.
«РикIел аламай кьван игитрал чан алама. Къуй рикIел хуьнин и багъ садвилин, дамахдин, баркаллувилин макан хьурай. Къуй ада кьилин ерияр рикIел хкурай: Ватан кIан хьун, халкьдин къуват ва эбеди игитвал», – лагьана Ф. Щукина.
Региондин Кьили къейд авурвал, ина гьар са къелемди игитвал, гьунарлувал, Ватандихъ авай кIанивал къалурзава.
«Агъзурралди дагъустанвийри, игитвал авуналди, кьинез вафалу хьуналди, дяведин махсус серенжемда иштиракзава. Лап и мукьвара 20 лагьай дагъустанвидиз – Иса Абдулгьалимоваз – Россиядин Игитвилин чIехи тIвар гана. Гьайиф хьи, – телеф хьайидалай гуьгъуьниз. Къе чна еке дамахдивди гьар са игит рикIел хкизва», – къейдна Ф. Щукина.
Махсус серенжемда телеф хьайи офицер, Жуьрэтлувилин кьве ордендин иеси Руслан Примован диде Аида Къарахановади кIватI хьанвайбуруз виридаз сагърай лагьана: «Тарихдин чинар хуьнай, Ватан патал чанар гайи чи игитар эбеди авунай куьн сагърай. И багъ рикIел хуьнин чан алай ярж я. Гьелбетда, чна гьар са къелемдиз ядни, чи кIанивални гуда. И багъди гьамиша чи рикIел игитар хкида. Абур чавай къакъатнавач, чахъ галаз и чилел яшамиш жезва. Гьар са къелемда, гьар са чихелда абурун руьгь ава».
Федор Щукина дяведин махсус серенжемдин иштиракчийрин багърийрив государстводин шабагьар вахкана. Россиядин Президентдин Указдалди Жуьрэтлувиляй, гьунарлувиляй, аскервилин буржи кьилиз акъуддайла, чанни гьайиф татунай Жуьрэтлувилин ордендалди (телеф хьайидалай кьулухъ) Ражаб Гьажалиев, Мегьамед Мегьамедов, Руслан Мегьамедов, Камил Магьадов, Арсен Нажафов, Ягья Рагьимов, Загьидин Рамазанов, Баглар Саидалиев, Камил Сейранов, Селим Ханмегьамедов, Вели Шамхалов, Агьмед Шагьсимирзоев, «Дирибашвиляй» кьвед лагьай дережадин медалдалди Ферман Байрамов къейдна.
Мегьарамдхуьруьн райондин администрациядин кьил Нариман Эфендиева и рикIера хуьнин чка ачухуна иштиракай виридаз сагърай лагьана. «Куь зегьмет себеб яз, и гуьзел макан арадал атана. Ада жуьреба-жуьре несилрин инсанар сад ийида, чи аскеррин игитвилер, ислягь уьмуьрдин къиметлувал рикIел хкида. Къуй и багъ мадни гегьенш, акьалтзавай несилриз чи чIехи бубайрикай, игитрикай малуматар гудайди хьурай. Къуй иниз атай гьар сада Ватан патал игитвал къалурай кьегьалрин викIегьвал, дирибашвал рикIел хуьрай. Абур себеб яз, чаз къе ислягь цавун кIаник яшамиш жедай, аялриз тербия гудай мумкинвал ава».
И юкъуз Федор Щукин Мегьарамдхуьруьн районда Россиядин Игитар тир дагъустанвийрин – Нурмегьамед Гьажимегьамедован, Муслим Муслимован, Хантемир Султанован, Курабег Караеван ва Ярамир Эмирханован – мукьвабурухъ галаз гуьруьшмиш хьана.
Суьгьбетдин вахтунда региондин Кьили баркаллу рухваяр тербияламишай диде-бубайриз рикIин сидкьидай сагърай лагьана: «Куьне викIегь, лайихлу, Ватандиз ва халкьдиз вафалу халис итимар чIехи авуна. Квез баркалла!»
Гуьруьшдин вахтунда кIватI хьанвайбуру аскеррин хизанриз куьмек гунин, игитар рикIел хуьнин ва яшайишдин маса месэлаяр веревирдна.
«Зун гьар юкъуз квекай гьар сад кьабулиз гьазур я. Эгер гьялна кIанзавай месэла хьайитIа, зи патав ша, квев куьмек агакьда. Сергей Алимович Меликова аскеррин хизанриз куьмек гунин кIвалах тешкилнавай гьал лап хъсанди тир. Ам чнани давамарда», – лагьана Дагъустандин Кьили.
Дяведин махсус серенжемда Россиядин сад лагьай Игитвилин тIварцIиз лайихлу хьайи Нурмегьамед Гьажимегьамедован диде Сапижат Мазаевади аскерриз ва абурун хизанриз куьмек гунай Федор Щукиназ сагърай лагьана: «Къуй куь патав гьамиша вафалу, кар алакьдай, республика патал зегьмет чIугвадай инсанар хьурай. Дагъустан чи уьлкведин са гъвечIи кIалуб я. Россия хьиз, амни пара гуьзел я. Чи итимар викIегьбур, уьтквембур, дишегьлияр сабурлубур ва мягькембур я».
Хийир Эмиров
