(Шаир Азиз Мирзебеговакай)
«Лезги газетдиз» акъатай Абдулафис Исмаилован «Пул вири я, анжах хайи ватан туш» макъалади гзафбурун фикир желбна. И макъала шаир ва алим, публицист ва литературовед, театровед ва таржумачи Мирзебегов Азиз Абдулмировичан уьмуьрдин рекьиз ва яратмишунриз бахшнава. Адай чаз инсандин лайихлу къамат, уьмуьрда адан чIехи кIвалах аквазва.
Журналистди, жегьил девирдилай эгечIна, А. Мирзебегова са-са кам къачуз, са-са йис кьулухъ таз, тухвай уьмуьрдин рекьикай, и рекье адал ацалтай уламрикайни четинвилерикай суьгьбетзава. Къенин юкъуз чаз чидай, вичиз гьуьрметзавай ва къимет гузвай А. Мирзебегов хьун патал ада чIугур зегьметар къалурзава.
Макъаладин автор А. Мирзебеговалай кьуру тарифар авунал машгъул туш, я абур адаз герекни авач. Инсанрин гьуьрмет ада вичин жуьреба-жуьре терефрин бажарагъдалди ва яратмишунин кIвалахдин девлетлу нетижайралди къазанмишнава.
Заз жув Алкьвадар Гьасан эфендидин тухумдикай тирвиляй А. Мирзебегован яратмишунрин са терефдал кьетIендаказ акъвазиз кIанзава. Ада вичин кIвалахда Алкьвадар Гьасан эфендидиз тIимил чинар бахшнавач. Абурукай яз, гъвечIи, амма метлебдиз девлетлу «Поэтическое творчество Гасана Алкадари» ктабни. А. Мирзебегова «Асари-Дагестан» как образец художественно-исторической прозы» темадай илимрин кандидатвилин диссертация хвена. Ам Алкьвадар Гьасан эфендидин туьрк чIалал яратмишунриз талукь «Великий поэт и просветитель» ктабдин авторни я.
Азербайжанда дидедиз хьайи А. Мирзебегова, гьеле жегьил яз, гьана яшамиш жезмайла, «РикIин гаф» газет акъудзавай. Гьахълу ва хци макъалаяр себеб яз, чкадин властри адан уьмуьр татугайди авунай. Вичин «рикIин гаф» гваз ам яратмишунин кIвалахдин жигъирдал экъечIна. Вахтар алатайла, а жигъир гегьенш шегьредиз элкъвена. Гила А. Мирзебегован гаф гьар са кIелзавайдан рикIе акьазва. За икI фикирзава: Дагъустандин халкьдин шаирдин тIвар кIелзавайбуру сесер гуналди къачузвайтIа, бинедай халкьдин шаир тир А. Мирзебеговахъ а тIвар фадлай жедай.
Гьуьсейн Гьуьсейнов,
Россиядин писателрин союздин член,
Алкьвадар Гьасан эфендидин музейдин директор
