СВО

Санкт-Петербургдин экономикадин меж­­д­ународный форумдал СМИ-рин векил­рихъ галаз гуьруьшмиш хьайила, Россиядин­ Пре­зидент Владимир Путина дяведин махсус­ серенжем эхирдиз къведай вахт алукьнава лагьанай. Дугъриданни, женгер Россиядин субъектринни Украинадин сергьятдин мулкара кьиле физва. Луганкскдин Респуб­ликадин шегьерар, хуьрер миллетбазрикай азаднава. Донецкдин Республикадин 90 процентдив агакьна мулкар неонацистрин гуьзчивилик кумач. Амайбур патални гьар юкъуз къизгъин женгер кьиле физва. И женгера чи ватанэгьлийрини иштиракзава ва халисан игитвилер къалурзава.

Дагъустандин ЦУР-ди, «Ватан хуьзвайбур» фондуни ва жемиятдин «Къуват садвиле ава» тешкилатди «Дагъустандин Игитар» проект уьмуьрдиз кечирмишиз пуд лагьай йис я. Организацийрин векилри датIана СВО-да викIегьвилер къалурзавай, государстводин ша­багьриз лайихлу хьанвай, дя­ведин махсус серенжемдин иштиракчийриз куьмек гузвай игитрикай материалар кIватIзава, социальный сетриз акъудзава, шикилрин выставкаяр туькIуьрзава, видеороликар гьазурзава. Нубатдин сеферда, проектдин сергьятра аваз, СтIал Сулейманан райондин Вини СтIалрин хуьряй тир штурмовик Раидин Гьасановакай куьруь фильм къалурна.

Раидин Гьасанов Каспийск шегьерда яшамиш жезва. Шегьердин собранидин депутат неинки хъсан пешекар, жумарт инсан, гьакI жемиятдин деятелни я. ЧIехи хизандин кьил, кьуд аялдин буба уьлкведа кьиле физвай вакъиайрикай яргъа хьана акъвазнач. Ада са шумуд сеферда дяведин махсус серенжемда миллетбазар уьлкведин чилелай чукурзавай кьегьалриз гуманитарный куьмек тухвана. Им адаз тIимил акуна. Эхирни, оборонадин министерстводихъ галаз икьрар кутIунна, гуьгьуьллувилелди махсус серенжемдиз фена.

– Дугъриданни, заз кIвале кьарай атанач, – лугьузва Раидин Гьасанова. – Серенжемдин иштиракчийрик зи мукьва гадаярни квай. Гьар сеферда Донбассдин чилел куьмек гваз фейила, заз Урусатдин кьушунрин, аскеррин гьунарар акуна. Абуру, вири четинвилериз таб гана, душман кукIварзавай, адаз, кьулухъ катдайвал, басрух гузвай. Гьелбетда, чи аскерар телеф жезвай дуьшуьшра рикI гьайифдивни ацIузвай. За жуваз лагьана: гуманитарный куьмек гунихъ галаз сад хьиз итимдин гъиле душмандиз рум гудай яракьни хьун лазим я. Гьа икI, закай штурмовик хьана.

Идахъ галаз сад хьиз, Гьасанова­ Урусатдик ахкатнавай цIийи районрин­ агьалийриз алакьдай куьмек гунин кIва­лахни давамарзава. ИкI, Херсондин областдин аялрин «Ивушка» бахчадиз жуь­реба-жуьре куьмекар гана. Женгера ви­кIегьвилелди иштиракунай, кIеве авай агьалийрин гъил кьунай ва ватанпересвилин гьерекатрай Гьасановаз Херсондин областдин губернатор Владимир Сальдоди «Херсондин областдин вилик лайихлувилерай» ордендин медаль, дивизиядин командирди гьуьрметдин грамотаяр гана.

Ял ягъиз, хайи макандиз хтайлани, ам секиндиз кIвале ацукьзавач. Школайра­, ссузра, вузра жаванрихъ, жегьилрихъ галаз гуьруьшмиш жезва, мектебра ачух тар­сар тухузва, абуруз СВО-дин макьсад­рикай, Россиядин аскеррин игитвилерикай суьгьбетзава, ватанпересвилин буржи квекай ибарат ятIа, мисалралди ачухарзава.  ИкI, майдин вацра Раидин Гьасанов Кас­пийск шегьердин 1, 2, 7, 8 лагьай нумрайрин юкьван школайрин педагогвилин коллективрихъ ва ученикрихъ галаз гуьруьш­миш ­хьана.

«Сад тир Россия» партиядин член, Кас­пийск шегьердин собранидин депутат, Дагъустандин парламентдин векилни жез кIанзавай дяведин махсус серенжемдин иштиракчиди Урусатдин кьушунри вилик эцигнавай везифайрикай, абуру Донбасс­дин мулкар азадзавай тегьердикай, вири четинвилериз дурум гана, гьар са участокда гъалибвилер къачузвай чи аскеррин дирибашвиликай ва чкадин агьалийриз гузвай гьар йикъан куьмекдикай суьгьбетна.

Аялрин суалриз жавабар гудайла, ас­керди лагьана: «Жегьилриз ватанпересвилин тербия гун «Сад тир Россия» партияди эвелимжи везифа яз гьисабзава. Ватанпересар тербияламишунихъ еке метлеб ава. Къе куьн аялар, жаванар ятIа, пака Дагъус­тандин ва Россиядин экономика, яшайиш, культура вилик тухудай устIарар, чи государстводин, халкьдин гележег я. Гьавиляй куь везифа исятда хъсандиз кIелун, рикIиз кIани пеше къачун ва ахпа Ватандиз намуслувилелди къуллугъ авун я».

Раидин Гьасанова вичин инсанвилин, гражданвилин, аскервилин буржи тамамарзава. Сагърай вич!

Абад  Азадов