Лугьуда хьи, азарлудан уьмуьрдин жилав сифте сад Аллагьдин, ахпа духтурдин гъиле ава. Дугъриданни, гьакI я. Духтурдин пешекарвилин дережадилай, мецелай, гъилелай пара крар аслу я.
Къенин зи суьгьбет вичин уьмуьр инсанрин сагъламвилиз бахшнавай духтур Агьмедова Зумрият Фахрудиновнадикай я. 2014-йисуз ада Дербент шегьердин сад лагьай нумрадин гимназия-мектеб къизилдин медалдалди акьалтIарна. Гьа йисуз Зумрият Москвадин И.М. Сеченован тIварунихъ галай медицинадин госуниверситетдик экечIна. Вузда кIелзавай йисара лезги руша анжах «вадар» къачуз хьана. Ана кьиле тухузвай вири мярекатра иштиракна. Нетижада Зумрията уьлкведа пешекар духтурар гьазурунай сад лагьай чкадал алай медицинадин кьилин вуз яру диплом къачуналди акьалтIарна. 2019-йисуз Португалиядин Лиссабон шегьерда ада кардиологиядин профилактикадай Европадин ассоциацияда иштиракна ва вичин доклад гваз экъечIна.
2020-2022 лагьай йисара Зумрията академик В.И. Кулакован тIварунихъ галай ФГБУ НМИЦ-да ординатурада кIелна. Акушер-гинекологвилин пеше къачуна.
– Сагъар хъувунин факультет акьалтIарна, ординатурада акушер-гинекологвилин пешекарвал хкягъунин себеб вуч я? – жузуна за.
– Алай макъамда сивин авачир дишегьлийрин кьадар йисалай-суз пара жезва. Амма дишегьлидин бахтлувал сифте нубатда дидевилин тIварцIе ава. Дишегьлидиз дидевилин тIвар багъишунилай чIехи суваб кар авани мегер? Гьавиляй за аспирантурада кIелзавай йисара жуван илимдин кIвалах дишегьлийрин сивинсузвал ва ам сагъардай алава цIийи къайдаяр хкягъун дуьшуьшдин кар туш, – жаваб гана ада.
Зумрията академик В.И. Кулакован тIварунихъ галай милли медицинада ахтармишунар кьиле тухудай акушервилинни гинекологиядин ва перинатологиядин центрада диссертациядин винел кьве йисуз кIвалахна. И центр Урусатдин сагъламвал хуьнин министерстводин къаюмвилик ква. Илимдин регьберар тир медицинадин илимрин докторар Н.П. Макаровади, Е.А. Калининади лезги таватди кьиле тухвай илимдин кIвалахдиз вини дережадин къимет гана. Алай йисан 17-мартдиз Агьмедова Зумрията медицинадин илимрин кандидатвилин тIвар къачун патал винидихъ тIвар кьунвай илимдин центрада диссертация хвена.
Диссертацийрин илимдин советдин векилри Агьмедова Зумриятаз медицинадин илимрин кандидатвилин тIвар гунин къарар акъудна. ВАК-ди (кьилин аттестациядин комиссияди) илимдин советдин къарар тестикьарна. Гьа икI, лезги илимдин цавал мад са гъед куькIвена.
Алай вахтунда Зумрията ООО «ЭН-ДЖИ СИ» клиникада акушер-гинеколог, репродуктолог яз кIвалахзава.
Чун инанмиш я хьи, къачунвай чирвилер, тежриба ада тамамдаказ халкьдин сагъламвилин рекье серфда.
Зумрият Азадогъли (Гъугъан) хуьряй акъатнавай медицинадин илимрин кандидат тIвар къачур кьвед лагьай алим я (сад лагьайди Гьамидов Ферид Азизович я).
Зумриятан буба Агьмедов Фахрудин Азадогъли хуьре кардик квай «Гоганский» тIвар алай тежрибадин станциядин директор я, хуьруьн майишатдин илимрин кандидат я. Диде Агьмедова Замина математикадин муаллим я (алай вахтунда кIвалахзавач). Абуру кьве велед чIехи авуна, уьмуьрдин шегьре рекьел акъудна.
Гьуьрметлу Зумрият духтур! Медицинадин илимрин кандидатвилин тIвар чна ваз рикIин сидкьидай мубаракзава. Илимдин кукIушар муьтIуьгъарунин рекье вахъ мадни чIехи агалкьунар хьурай!
Мукаил Агьмедов,
РФ-дин журналистрин союздин член
