Алай йисан 29-30-сентябрдин йикъара Каспийск шегьер хуьруьн майишатдин зегьметчияр желбдай мулкуниз элкъведа. Ина международный агропромышленный «ДагАгроКаспий» выставка 4-сеферда кьиле фида. Выставкада Россиядин ва са жерге маса уьлквейрай тир 100-далай гзаф компанийри иштиракун гуьзлемишзава. Абуру лежбервилин хилен месэлаяр гьялдай алай аямдин цIийи технологияр ва къайдаяр майдандиз акъуддайвал я.
Выставка багъманчияр, уьзуьмчияр, малдарар, гьакIни теплицайра майваяр гьасилзавайбур патал менфятлуди ва итижлуди хьун лазим я. Мярекатдин мугьманриз эхиримжи жуьрейрин тадаракрихъ ва бегьерлувал хкажиз куьмек гудай инновациядин суьрсетрихъ галаз таниш жедай мумкинвал жеда. Мярекат РД-дин хуьруьн майишатдин ва недай суьрсетдин министерстводи ва «Дагъустандин теплицаяр» Ассоциацияди санал тешкилда.
«ДагАгроКаспий» хуьруьн майишатдин хиле зегьмет чIугвазвайбур патал сада садан тежрибадикай менфят къачудай, пешедин рекьяй амадагар жагъурдай ва илимдин гележег авай разработкаяр хуьруьн майишатдин тежрибада ишлемишдай рекьер ачухдай майдан я.
Тешкилатчийри лежберриз, фермерриз ва пешекарриз мярекатда иштиракун теклифзава.
«Лезги газет»
