2025-йисан зул вичин ихтиярда гьатнавай. Дагъларин уьл­кведин меркезда зул гзаф вахтара пара чIагайди, гуьлуьшанди, секинди, инсандин гуьгьуьл ачухарзавайди жеда. Республикадин­ Кьил Сергей Меликоваз, гьайиф­ хьи, жавабдар везифайрин, гьар йикъан къайгъуйрин, гьялна кIан­завай кьван месэлайрин гъиляй зулун чIагай, тIарам гьавайрикай лезет хкуддай вахт авачир. Гьа и чIавуз адан тIварцIихъ хквезвай­ документрин, чарарин, малу­мат­­рин арада дяведин махсус се­рен­жем физвай чкайрай хтанвай­ чарни авай. Ам кхьенвайди гвар­дия­дин 42-дивизиядин 70-мо­тострелковый­ полкунин командир, полковник Анзор Хабилов тир. Кагъазда ихьтин гафар авай:

«Чаз Куьн ва куь халкь а кардикай хабардар ийиз кIанзава хьи, Куь рухвайри дяведин махсус серенжемда, зурба жуьрэтлувал ва игитвал къалуруналди, важиблу тапшуругъар, везифаяр тамамарзава. Ахьтинбурукай сад Зураб Агьмедов я. Ада неинки полкунин аскеррин женгинин къаст, руьгь мягькемарзава, абуруз чешне къалурзава, гьакI Куь чилел уьлкведин хатасузвал, ислягьвал ва аслу туширвал хуьн патал игитвилер къалурдай рухваяр тербияламишзавайди успатзава. Инанмиш я, ихьтин хъсан ерияр адав халкьдин адетрин, бубайрин баркаллу крарин бинедаллаз гайи тербияди агакьарна. Зураб Агьмедоваз государстводин патай хейлин шабагьар ганва. Чун агъунва хьи, Дагъустан Рес­публикадини батальондин командирдин, Россия­дин Яракьлу Къуват­рин офицердин гьунарар, лайихлувилер къейд ийи­да…»

Зураб Агьмедов 1992-йисуз Махачкъалада агъастIалви Жаб­раил Нежведиловичан ва Рашидова Санаядин хизанда дидедиз хьана. Астрахандин балугъринни гьуьлуьн институт куьтягьай Жаб­раила хейлин йисара «Дагрыба» трестда ва республикадин балугърин майишатдин департаментда зегьмет чIугуна.

Меркездин 37-нумрадин юкьван школада кIелзавай жаван шегьердин хъсан спортсменрин жергедани авай. Азаддиз кьуршахар­ кьадайбурун секциядиз физвай Зу­раба, гьар са турнирда гъалиб­вилер къачуз, диде-бубадин, классдин ва санлай школадин коллек­тивдин патай кIанивал, гьуьрмет­ къазанмишна. Адакай са шумуд сеферда Махачкъаладин чем­пи­он,­ Дагъустандин чемпионатдин при­зер хьана. Между­народный турниррайни ам гимишдин, буьруьнждин медалар гваз хтана. Калмыкияда кьиле фейи мастервилин турнирда 80 килограмм­дилай виниз заланвал авайбурун арада сад лагьай чка кьур адаз спортдин мастер лагьай тIвар ­гана.

Технический университетда кIелдайлани, Агьмедов спортдивай къерех хьанач. Са шумудра студентрин акъажунра техуниверситетдин патай экъечIуналди, ада командадиз герек баллар къазанмишна.

XXI асирдин сифте кьилер Да­гъустан патал муракаббур, агьалияр датIана къалабулухдик кутазвайбур хьана. Ягъун-кьиникь, та­рашчивал, лутувал тир. Ихьтин­ шартIара иллаки жегьилриз уьмуьр­ тухун, тешкилун четин акъваззавай. Университетар, институтар куьтягьайбур, кIвалах гьат тийиз­, куьчейра амукьзавай. Гзафбур, эхир кьил гьихьтинди же­датIа чин тийиз бизнесдал элячIна. Адаз бизнесни лугьун кутугнавач. Шей маса къачун, масадаз, алава къиметни эхцигна, маса гун, яни халисан алвер. Зурабни гьа и жуьредин лепедик акатна.

Маса уьлквейрай автомашинар гъиз, ада муьштерийриз маса хгузвай. Адалай и кар алакьзавай. Герек вахтунда куьмек гудай багърияр, дустар, юлдашар авай. Амма лутуяр, тарашчияр, тапархъанар, пехилбур авай чкада бизнес, жуван кар кьиле тухун регьят тушир. Гададин гуьгъуьна къайдаяр хуьдай органрин «итимарни», бандитрин кIеретIарни гьатна. Гьахълу, ихтибарлу, дуьзвал гвай касдиз амайбурни вич хьтинбур хьиз жеда. Вич агъунвай, ихтибарзавай гадайри лап хаинвална. Масадбурухъ галаз гаф-чIал садна, Зураба хкай са шумуд машин фейи падни чирнач. Зураб буржара гьатна. Хизанарни къурхулувилик акатна. Ихьтин гьаларай жегьил итим вичиз зиян къачуна экъечIна…

Вад йис вилик Зурабан уьмуьрда виридалайни шад, рикIелай алат тийидай кьетIен вакъиа хьана. Адазни Умузагьрат тIвар алай рушаз диде-бубайри мехъерарна, жегьилри хизан кутуна. Къе хизанда кьве руша тербия къачузва.

Украинадин миллетбазрихъ га­лаз дяведин махсус серенжем­див эгечIайла, гзаф жегьилар гуьгьуьл­лувилелди аниз фена. Ватандин­ итижар хуьн гьар са эркекдин бур­жи­ я. РикIе чIуру ния­тар авай нео­на­цис­трин вилик пад кьазвай женгерик Зурабни экечI­на. Кьве йисни­ зур я Агьмедова Запорожьедин областда аскервилин буржи тамамариз. Кьве йисни зур. Садни агъадач, белки­, гьа и куьруь вахтунда жергедин ас­кер капитандин чиндив агакьна. Адал батальон ихтибар­нава.

2023-йисуз США-дин ва коллективный западдин куьмек агакьзавай Украинадин миллетбазри са шумуд терефдихъ кьетIи гьужумар тешкилнай ва хейлин хуьрер кьунай. Абурук Работино поселокни акатзавай. ДатIана артил­лериядин, дронрин, бомбайрин­ ягъунрик акатай хуьре сагъ кIвал, дара­мат амукьнач. Душманди вири барбатIна ва ана мягькем сенгерар кьуна. Анжах 2024-йисан­ майдин юкьвара Россиядин кьушунри, иллаки «Днепр» группадин­ подразделенийри, поселок мил­лет­баз­ри­кай азад хъувуна. Кьве па­тайни­ телефвилер арадал гъайи женгера Зураб Агьмедова­ ахьтин­ викIегь­вал, жуьрэтлувал­, ви­лик эцигзавай тапшуругъар гъи­ле-гъил аваз кьилиз акъуддай къаст ва тешкиллувал къалурна хьи, полкунин командирди адаз лейтенантвилин чин гунин къарар кьабулна, чIехи командирри и къарардин тереф хвена. Ингье къе ам капитан, батальондин командир я. Кар алакьдай, душман тергза­вай, вичин гъилик квай аскеррин сала­матвал хуьзвай, анжах­ виликди гьерекатзавай командир. ГьакI тирвиляй адан патахъай командирри Дагъустандин Кьил Сергей Меликоваз, СтIал Сулейма­нан райондин администрациядин кьил Саид Темирхановаз разивилин чарар кхьена.

Аллагь рази хьурай чи ватанэгьлидилай. Ада Зураб Агьме­до­ваз, адан чIехи командирриз республикадиз теклифна. Агъа­стIалви хайи ватандиз вичи къуллугъзавай дивизиядин командирдин замес­титель, полковник Анзор Хабиловахъ, военный проку­рордин заместитель, полковник Ренад Османовахъ галаз хтана, республика­дин регьберди абурухъ галаз хъсан гуьруьш тешкилна. И мярекатда Абдулмуслим Абдулмуслимова, РД-дин милли сиясатдин ва динрин крарин рекьяй министрдин везифаяр тамамарзавай Темирлан Абуталимова иштиракна. Малум хьайивал, Россия­дин Игит Темирланни Хабилова регьбервал гузвай мотострелковый полкунин аскер тир. Кьегьалри чпи санал къуллугъ авур вахтарни рикIел хкана. Агьме­дов Зурабаз «Дагъус­тандин вилик ла­йихлувилерай» орден гана.

Пуд сеферда душмандин гуьл­лейрик, дронрик акатнатIани, гос­питалра къатканатIани, армиядай­ кIвализ, хизандин патав хкведай­ мумкинвал ганвайтIани, агъа­стIал­види къуллугъ давамарзава, батальондин аскеррихъ галаз санал неонацистар Донбасс­дин чилелай чукурзава, хуьрер азадзава.

Саид Мусиновичан тIварцIихъ кхьенвай чарче ихьтин гафар ава: «Куь ватанэгьлиди фронтдин Запорожьедин мулкара хсуси чешнедалди, вилик эцигзавай женгинин тапшуругъар игитвилелди та­мамарун таъминарзава. Зураб Жабраилович «Запорожьедин областдин вилик лайихлувилерай» I, II дережайрин, «Жуьрэтлувиляй», Суворован, «Дагъустандин халкьдин игит» медалрин сагьиб я. Ватандал рикI алай гьахьтин ватанперес тербияламишунай Квез баркалла!»

Ихьтин игит хва тербияламишнавай Агьмедоврин хизандиз­ баркалла! Къуй чи кьегьалар, гъа­либвал къазанмишна, сагъ-сала­матдиз кIвалериз хкведай вахт мукьвал хьурай!

Нариман  Ибрагьимов