Миллетбазар чукурзава
Россиядин оборонадин министерстводи 16-июндиз «Максда» хабар гайивал, уьлкведин ВКС-ди (Воздушно-космические силы) мидядин беспилотникар идара ийизвай ва Украинадин кьушунар вахтуналди акъвазнавай чкаяр тайинарна ва анриз авиациядин ягъунар кьуна.
И юкъуз чи аскеррин «Юкь» дестеди агалкьунралди кьилиз акъудай гьужумдин гьерекатрин нетижада ДНР-дин Новый Донбасс поселок азадна.
ДНР-дин Константиновкада чи аскеррин «Кьиблепад» гьужумдин дестеди женгинин гьерекатар викIегьвилелди давамарзава ва 120 дарамат украинви боевикрикай азадна. Шегьердин кьиблединни рагъакIидай патан паюна ВСУ-дин механизмламишнавай бригадайрин подразделенияр терг авун давам жезва. Къейдзавайвал, суткадин муддатда Константиновкада 100-дав агакьна боевикар, дяведин мягькемарнавай 5 машин, гьа жергедай яз Канадада, США-да акъуднавайбурни, 19 пикап, артиллериядин 2 яракь ва чилел кардик кутадай роботламишнавай 23 комплекс тергна.
Уран ракъурда лугьузва
Британияди Украинадиз АЭС патал 280 миллион доллардин къимет авай уран ракъурдайвал я. Ихьтин фикир а уьлкведин премьер-министр К.Стармера малумарнава.
«РИА Новости» чешмеди хабар гузвайвал, Великобритания къведай кьве йисуз Украинадин атомный электростанцийрин кIвалах таъминарун патал уран ракъуриз гьазур я. Лондонди 2023-йисан августдизни 245 миллион доллардин къимет авай уран маса гунин патахъай Киевдихъ галаз икьрар кутIуннай.
Чешмеди 16-июндиз хабар гайивал, Великобританияди Россиядиз акси санкцийрин сиягь 70-дан гегьеншар хъувунва. Британиядин финансрин министерстводи чапнавай малуматда къейднавайвал, сиягьдиз РФ-дин ва маса уьлквейрин 32 тешкилат, гьа жергедай яз Wildberries банк ва «Яндекс банк», гьакIни 11 кас ва 27 гими алава хъувунва.
Меркездихъ ахъайзава
ВСУ-ди мад Москвадихъ цIудралди дронар ахъайна. Идакай 16-июндиз меркездин мэр С. Собянина хабар гана.
«Эхиримжи йикъара мидяди Москвадал пилот галачиз лув гудай аппаратрин куьмекдалди гьужум давамарзава. Са дронди нафтIадин заводдин мулкарал алай объектдиз зиян гана. Инсанриз хасаратвилер хьанвач», – кхьена С.Собянина «Макс» мессенджерда.
Гуьгъуьнлай малум хьайивал, нафтIадин заводдин мулкара арадал атай цIай тамамвилелди хкадар хъувуна. МЧС-дин делилралди, цIай кьуникди карханадин кIвалахдиз кьецI ганач.
С. Собянинан гафаралди, ПВО-дин такьатрин куьмекдалди мидядин 60-дав агакьна беспилотникар яна. Меркездин аэропортарин кIвалахдал вахтуналди сергьятар эцигна. Гуьгъуьнлай кIвалах адетдин тартибда хтуна.
Россиядин оборонадин министерстводи хабар гайивал, 15-июндин йифен сятдин 8-далай 16-июндин экуьнин сятдин 7-далди ПВО-дин такьатрин куьмекдалди Украинадин 172 беспилотник кьуна ва тергна. Мидяди самолетдин жуьредин беспилотникар Астрахандин, Белгороддин, Брянскдин, Калугадин, Курскдин, Волгограддин, Воронеждин, Орелдин, Тамбовдин, Туладин, Ростовдин, Рязандин областрихъ, Москвадин региондихъ, Краснодардин крайдихъ, Крым республикадихъ, Азов ва ЧIулав гьуьлерин сергьятрихъ ахъайнавай.
«Къуватдин чIалан»…
Бандерайрин Украина анжах «къуватдин чIалан» гъавурда акьазва, Киевда международный ихтиярар, судар гьич гьисаба кьазвач. Ихьтин фикир РФ-дин хатасузвилин советдин председателдин заместитель Дмитрий Медведева «Максда» кардик квай вичин каналда кхьенва.
Ада Европадин мурдар ксари бандерачийрин цIийи ва гегьенш хъийизвай флот, гьа жергедай яз гьуьлуьн БПЛА-яр, военный парар тухузвай алишверишдин гимияр, яракьлу къуватар терг авун герек яз гьисабзава.
«Лезги газет»
