Танкистрихъ, разведчикрихъ, штурмовикрихъ, летчикрихъ, артиллеристрихъ галаз санал дяведин махсус серенжемда чи духтуррини иштиракзава, абуру дамахдай хьтин кьегьалвилер къалурзава. Гьа ихьтин жуьреда вичин пешекарвилин ва аскервилин везифаяр кьилиз акъудзавай духтуррикай сад Мегьарамдхуьряй тир Жабраилов Давид Къадирович я.

Хуьруьн 1-нумрадин юкьван школада кIел­замаз, ада вичиз гележегдин пеше хкянавай: духтур хьун. Вични — военный духтур. Гьавиляй ам классда, школада вичин везифаяр лап хъсандиз кьилиз акъудиз алахъна. КIелунай, низамдай, школадин общест­венный уьмуьрда иштиракунай ам юлдашриз чешне тир.

Школа куьтягьай Давид Санкт-Петер­бургдин военно-медицинадин академиядик­ экечIна. Хуьряй фенвай жаван тиртIани, ада гьич са уламдани зайифвал къалурнач. Вири вахт кIелуниз, тIвар-ван авай профессорривай, пешекар духтурривай гележегдин пешедин сирер чирна, Петербургдин клиникайра тежрибадин тарсара хъсан вердишвилер къачуна.

Академиядин диплом гвай жегьил духтур, офицер 2024-йисуз Новороссийск шегьердиз Яру Пайдах, Суворован ва Кутузован орденар авай  десантринни штурмовик­рин гвардиядин 7-дивизиядиз ракъурна. Анайни – дяведин махсус серенжемдиз. Командирри лугьузвайвал, Жабраилова женгинин юлдашар къутармишунин карда гьар юкъуз кьве игитвал къалурзава: десантникди ва духтурди хьиз. Десантник-штурмовик хьиз, ам гьар юкъуз женгерик экечIзава, гьа са вахтунда хирер хьайи аскерриз, офицерриз сифтегьан куьмек гузва, абур саламат чкадиз агакьарзава.

Ада везифаяр тамамарзавай гьалдилай­ дивизиядин командирар пара рази я. И карни адаз уьлкведин Президентдин къарар­далди ганвай шабагьри шагьидвалзава: «Женгера тафаватлу хьунай», «Аскервилин гьунарлувиляй», «Рекьизвайбур къутармишунай», «Дяведин махсус серенжемдин иштиракчидиз» медалар.

Гвардиядин старший лейтенант отпускдиз хтанвай. Райондин администрацияди адахъ галаз гуьруьш тешкилна. Райондин регьбер Нариман Эфендиева ва Мегьарамдхуьруьн администрациядин кьил Адил Муслимова уьтквем офицердиз, духтурдиз Ватандиз викIегьвилелди къуллугъ авунай сагърай лагьана, адаз муниципалитетдин гьуьрметдин грамота гана.

Абад Азадов