Арзаяр кьабулуникай
РД-дин эцигунрин, архитектурадин ва ЖКХ-дин министерстводи мартдин эхирра къвайи къати марфарин нетижада зиянар хьайи Дербент райондин агьалийривай са сеферда гудай пулдин такьатар чара авун патал 15-июндилай документар кьабулиз эгечIдайдакай малумарзава.
Куьмекдин серенжем кьве кар фикирда кьуна гуда:
– эгер кIвал яшамиш хьун патал виже текъверди яз гьисабнаватIа, цIийи кIвал эцигун ва я ам маса къачун патал;
– эгер кIвал арадал хкиз жедай гьалда аватIа, тамамдиз цIийикIа туькIуьр хъувун патал.
Винидихъ тIвар кьунвай министерстводин телеграм-каналда къейднавайвал, арзаяр кьабулунин кIвалах Дербент райондин администрацияда РД-дин эцигунрин, архитектурадин ва ЖКХ-дин министерстводин пешекарри кьилиз акъудда.
Арзаяр15-июндилай 23-июндалди гьар юкъуз кьабулда, кIвалах тийизвай йикъарани кваз: экуьнин сятдин 9-далай нисинин сятдин 1-дал кьван (9:00-13:00) ва нисинин сятдин 2-далай нянин сятдин 6-дан зурал кьван (14:00-17:30).
Документар пландал-графикдал асаслу яз тайинарнавай вахтунда кьабулда. Виликамаз кхьин тавунмаз (запись), документар кьабулдач. Агьалийривай чеб арзаяр гваз атана кIанзавай вахт РД-дин эцигунрин, архитектурадин ва ЖКХ-дин министерстводин официальный сайтдай чириз жеда.
Пулдин куьмек къачун патал агъадихъ галай дуьшуьшра арза гуз жеда.
Эгер кIвал чкIанватIа, пулдин куьмек талукь я:
— махсус комиссияди яшамиш жедай гьалда амачирди тестикьарнавай къарар акъуднавай кIвалерин иесийриз;
— тIебиатдин бедбахтвал арадал атай чIавуз эменнидин сагьибдин ихтиярар регистрация ийидай мумкинвал гузвай документар гвай агьалийриз;
— винидихъ къалурнавай категорийрик акатзавай хизанра яшамиш жезвай гьар са касдиз (эгер абур завалдик акатнавай кIвалера регистрация авунватIа ва я хизанда авай гьар са касдал кIвалин умуми майдандикай 18 кв.м. тIимил ацалтзаватIа).
Эгер кIвализ зиян хьанватIа, пулдин куьмек талукь я:
— махсус комиссияди тамамдиз цIийикIа туькIуьр хъувуна кIанзавайди тестикьарнавай къарар акъуднавай кIвалерин иесийриз.
Арза вугудайла, документрин оригиналар ва я абурун нотариусда тестикьарнавай копияр герек къведа.
КIвал пуч хьунай пулдин такьатар къачун патал герек я: хизандин вири членрин паспортар (аялрин шагьадатнамаяр); пуч хьанвай кIвалин гьакъиндай ам куь хсусият тирди тестикьарзавай документар (ЕГРН-дай выписка, маса гунин-къачунин икьрар, ирсинин шагьадатнама), пулдин такьатар ракъурун патал куь банкунин счетдин реквизитар.
Сертификат гунин арза ва чкIанвай кIвал муниципалитетдив вахкудай мажбурнама квез чкадал ацIуриз куьмек гуда.
Капитальный ремонтдин выплата къачун патал герек я: хизандин вири членрин паспортар; зиян хьанвай яшайишдин кIвал хсусият тирди тестикьарзавай документар; счетдин реквизитар ва я пудратчи тешкилатдихъ галаз кутIуннавай икьрар; 6 вацран къене ремонтда лагьай мажбурнама (чкадал ацIурзава).
Яшайишдин кIвал пуч ва я адаз зиян хьунин гьакъиндай администрацийрин кьилерин буйругъ (распоряжение) вугун герек къвезвач – абур пешекаррив гвазва.
Са гьихьтин ятIани себебар аваз, эгер квевай къалурнавай муддатда Дербент райондин администрациядиз къвез жезвачтIа, интернетда авай ГИС «Реестр очередников» къурулушда «жуван кабинет» регистрация авуналди электронный къайдада арза кхьиз жеда ва я — МФЦ-диз жув фена (ина пешекарри квез регистрация жез ва онлайн къайдада арза кхьиз куьмекда). ГьакIни квевай и кардин патахъай РД-дин эцигунрин, архитектурадин ва ЖКХ-дин министерстводиз лугьуз жеда.
Къейдзавайвал, министерстводин пешекарар агьалийриз и серенжемдин гьакъиндай вири крарай кьил акъудиз куьмек гуз гьазур я: шегьердин телефон 8 (8722) 56-46-46, «алава тирди» 0005; мобильный телефон (анжах сообщенияр патал) : 8 928 529-97-29.
Зенгер кIвалахдай йикъара экуьнин сятдин 9-далай нянин 6-далди кьабулзава.
ЦIийи рекъемар
Къати марфар къунин нетижада зиянар хьайи 40 агъзурдалай гзаф ксари Дагъустанда куьмекдин пулар къачунва. Идакай РД-дин Гьукуматдин телеграм-каналди хабар гузва.
Агьалийриз пулдалди куьмек гунин серенжемдин сергьятра аваз 40 370 касдиз и жуьредин такьатар тайинарнава. И серенжемар патал 1,5 миллиард манатдилай гзаф пулдин такьатар акъатнава.
Гьазурайди – Муса Агьмедов
