Дагъустандин Кьилин везифаяр вахтуналди тамамарзавай Фёдор Щукина дагъустанви Иса Абдулгьалимоваз Россиядин Игит лагьай тIвар (кьейидалай кьулухъ) ганвайдакай хабар гана. Ам СВО башламишайдалай кьулухъ и чIехи тIварцIиз лайихлу хьанвай къад лагьай дагъустанви я.

Гвардиядин лейтенант, 177 лагьай кьилдин гвардиядин полкунин гьуьлуьн пияда кьушундин батальондин де­сантник­ринни гьужумчийрин ротадин командир Иса Абдулгьалимова дяведин махсус серенжемда гьа сифте йикъарилай иштиракзавай.

«Ада Мариуполда, Бер­дянскда, Мелитополда ва Работинода женгинин тап­шуругъар тамамарзавай. Къалурай ви­кIегьвилериз, кьегьалвилериз килигна, ам махсус медалризни орденриз лайихлу хьана. Херсондин областдин Крынки азад хъийидайла, офицердал залан хирер хьана. Амма, сагъ хъжезмазди, кьушундик экечI хъувуна ва Курскдин областда къуллугъ кьилиз акъудун давамарна.

Иса Абдулгьалимова вичин эхиримжи женг алатай йисан июндиз кьиле тухвана. Сумский областдин Алексеевка хуьре ада гьужумдин дестейриз регьбервал гузвай. Идара ийизвай пунктунихъ душманди тупарай гзаф кьадар хъиткьиндай­ гуьл­леяр ахъайзавайла, офицер, вич алай чка туна, катнач. Тупарай ягъунин нетижада адан бедендин рикI авай патал ракьун кIусуни хер авуна. Гьич са къадамни кьулухъ къачун тавуна, Иса Игит хьиз телеф хьана.

Иса Абдулгьалимован – халисан кьегьалдин, Да­гъустандин лайихлу хцин – мукьва-кьилийриз, багърийриз башсагълугъвал гуз­­ва», – кхьенва Фёдор Щу­­ки­на «Макс» мессенд­жер­да, ­Ватан хуьниз вичин чан бахш авур Игитдиз тербия гайи диде-бубадиз сагърай малумару­налди.

Къейд ийин, Иса Абдулгьалимов Бежта участокдин Хашархота хуьре 1994-йисуз муаллимрин хизанда дидедиз хьана.

Чи мухбир