15-июндиз Фёдор Щукин РД-да инсандин ихтияррин патахъай векилвалзавай Запир Алхасовахъ галаз гуьруьшмиш хьана. Идакай РД-дин Кьилин пресс-къуллугъди хабар гана.
Гуьруьшдин вахтунда абуру алатай йисуз авур кIвалахдиз талукь доклад ва ватандашрин ихтиярар хуьнин жигьетдай республикада авай гьалар веревирдна. Малум хьайивал, шаз агьалийрилай 1,7 агъзур арза агакьна. Абурун чIехи пай яшайишдин ихтиярриз талукьбур я, кьвед лагьай чкадал хсуси ихтиярриз талукь месэла ала.
З.Алхасова къейд авурвал, кьиле тухвай кIвалахрин нетижада 2,5 агъзур касдин ихтиярар гуьнгуьна хтуна, 500-далай гзаф ксариз юриствилин хиляй куьмек гана. Куьмек агакьайбурун жергеда аялар галай хизанарни ава, нетижада абуруз талукь тир пулунин такьатар тайинарна.
Алай йисуз асул гьисабдай ихьтин важиблу месэлайриз фикир гана: дарманралди таъминаруниз, кьилдин ксарив медицинадин куьмек агакьаруниз, СВО-дин иштиракчийрин ва абурун багърийрин ихтиярар хуьниз.
Ф. Щукина ватандашрин ихтиярар хуьнин месэлада гележегда алакъалувилелди кIвалахиз гьазур тирди малумарна.
Салим Салимов
