Къе чи ихтилат 56 йисуз Мегьарамдхуьруьн райондин Хъартас-Къазмайрин юкьван мектебда баркаллувилелди зегьмет чIугур, 26 йисуз мектебдин завучвилин къуллугъни тамамарай Мегьамедханов Эседуллагь Жамалдиновичакай фида. Алай йисуз адан 90 йис тамам жезва. Эседуллагь муаллимдин ери-бине Мегьарамдхуьруьн райондин ЦIелегуьнрин хуьряй я. Адан буба фермадал серкер тир. Эседуллагь 1936-йисуз Умужат дидедиз эхиримжи аял яз хьанай. Заз авур ихтилатрай, адан аял вахтар пара пелешдиз фена. Буба 1937-йисуз, тапан тахсирар кутуна, кьуна, адаз 10 йис дустагъ атIана. Беломор-Балтийский къаналдал кIвалахзавай ам 1938-йисуз стIалжемдик гьана кечмиш хьана.
Ватан душмандикай хуьз гуьгьуьллувилелди дяведиз фейи адан чIехи стха Муьнуллагьа залан хирер хьуникди Украинада госпиталда чан гана. Ирид кьил хизан текдиз са вичин хиве гьатнавай Умужат дидеди ажузвал къалурнач. Юкьва кашудин еб кутIунна, ада колхоздин вичел ихтибар авур вири залан кIвалахар намуслувилелди кьилиз акъуднай.
Эседуллагь муаллимди, вилериз нагъв хъиткьинна, ухьт аладарна, яваш ванцелди давамарна:
– Чаз виридаз рагьметлуда кIелдай береда куьмекар гудай. Женнет кьисмет хьурай вичиз! Зи диде капI-тIеат ийидай, мусурман адетар хуьдай дишегьли тир.
Тагьирхуьруьн-Къазмайрин юкьван школа куьтягьна, жегьил Дербентдин педучилищедик экечIна. Советрин Армияда къуллугъна хтайла, училище куьтягьна. Гуьгъуьнлай Липецк шегьерда пединститутда филологиядин факультетда кIел хъувуна. 1967-йисуз вуз акьалтIарна, Хъартас-Къазмайрин юкьван школада кIвалахиз башламишна. Акьалтзавай несилдин къайгъуда хьайи Эседуллагь муаллимдин зегьмет кьетIенди я. Белки, и касдин кIвалахдин еридиз аялвилинни жегьилвилин дар ва залан девирри таъсирнатIа? Чаз анжах ашкара я: кIвалахдив эгечIай сифте йикъалай Эседуллагь муаллимдал зегьметдал рикI алай, гьар са кардив мукьуфдивди эгечIдай пешекар муаллимар гьалтна. Эседуллагь Жамалдинович а ксарилай пара рази я.
Муаллимдин везифа анжах аялриз са чирвилер гун туш, абурукай ватандиз хийир авай ксар тербияламишунни гзаф важиблу я. Гьа и рекьяйни Эседуллагь муаллимдин терефдал алайбур хизандани, коллективдани тIимил хьанач. И карди адак еке гьевес кутуна. Ихтилатдай аквазвайвал, вичин уьмуьрдал Эседуллагь Жамалдинович рази я. Гьар са кас вичелай чешне къачуз жедайди, дуьз меслят къалурдайди хьана кIанда. МасакIа коллективдин кIвалах виликди фидач. Эседуллагь муаллимни гьахьтинбурукай сад, жемятдин арада кIвенкIвечи тешкилатчи я.
– За гьеле 6-классда кIелзамаз, – суьгьбет давамарзава ада, – чуьнгуьр, ахпа сазни ягъиз чирнай. Гуьгъуьнлай, Дербентдин педучилищеда кIелзавай макъамда зун еке устадрин арада хьана. Хъартас-Къазмайрин мектебда кIвалахиз башламишай вахтара за гьевесдалди художественный самодеятельностдин кружок тешкилна. Къе и кардихъ чIалахъни хьун са тIимил четин я: 9-10-классра кIелзавай аялрин концертдин программаяр гваз чун Дербентдин, СтIал Сулейманан, Кьурагьрин ва чи райондин хейлин хуьрериз мугьман хьайиди я. Гьар са чкада чун хушвилелди къаршиламишдай, чаз, кIвачел къарагъна, гурлу капар ядай.
Эседуллагь Жамалдиновича зегьмет чIугур девирдин сад-кьве делилдал акъвазин. Ам руководитель тир классда кIелай 24 аялдини «4» ва «5» къиметралди, Мурадов Альбертани Шихагьмедов Сергея къизилдин медалралди школа куьтягьнай. КIвалахдин дережаяр акурла, Эседуллагь муаллим директордин заместителдин къуллугъдални тайинарнай. Везифаяр гьакъисагъвилелди кьилиз акъудиз, жегьил муаллимриз куьмек гунин мураддалди ада методкабинет тешкилнай ва методикадин лазим литературадалдини алатралди таъминарнай. Районда ам чешнелу методкабинетрикай сад хьанай. 2005-йисуз районда кьиле фейи «Виридалайни хъсан кабинет» конкурсда ада 2-чка, 2011-2012-кIелунин йисуз райондин олимпиадайра иштиракай 34 мектебдин арада 2-чка къазанмишнай. Гьам муаллим, гьамни директордин заместитель яз, хейлин йисара Эседуллагь Жамалдиновичан шикил Гьуьрметдин доскада хьанай. Адан альбом райондин администрациядин ва школадин патай гайи гьуьрметдин чарарайни грамотайрай ацIанва.
Махачкъалада, Каспийскда, Бакуда, Кьиблепатан Дагъустандин вири районра Эседуллагь муаллим чидайбур гзаф ава. Ам столдихъ, кимел, межлисда гьамиша хкя тавур тамада я. Ачух чин, сабурлувал, тади квачиз рахун, къешенг чIал, ара-бир маса миллетрин чIаларикайни менфят къачун – ибур адаз хас къилихар я. Эседуллагь муаллим вичин веледрилай, кIвалахай коллективдилай, гьакимрилай лап рази я. Адан зегьметдиз дуьзгуьн къиметни ганва. Ам РФ-дин просвещенидин гьуьрметлу работник, РД-дин лайихлу муаллим я. Адахъ хейлин гьуьрметдин грамотаяр ава. Эседуллагь муаллим «Лезги газетдин» амадагни я. Гьа икI сагърай вун, камаллу кас!
Алаудин Саидов,
Дагъустандин лайихлу муаллим,
Мегьарамдхуьр
