Месэла къарагъарзава
«Лезги газетдин» 18-нумрада ганвай Абдулафис Исмаилован «Пул вири я, анжах хайи Ватан туш» макъала кIелайла, заз пара хуш хьана. Ана 2007-йисалай заз хъсандиз чизвай, чна санал лезги чIалаз ва музыкадин искусстводиз талукь са шумуд мярекатар тухвай ва гилани тухузвай зи руьгьдин дуст, акьуллу, фикиррин хцивал авай машгьур ва бажарагълу шаир, литературовед, театровед, жемиятчи, гьакIни дамах гвачир, намус квай, масадаз анжах хъсанвал хьана кIандай Азиз Мирзебегован литературадин ва шииратдин эсерриз чIехи къимет ганва. Азиз вичин яратмишунра, жемиятдин мярекатра гьамиша хайи халкьдин рикIяй рахазвай шаир тирди субутнава ва адаз Дагъустандин халкьдин шаир лагьай тIвар гун икьван гагьди садан рикIелни атун тавунвайвиляй наразивал къалурнава.
За Азиз Мирзебеговахъ галаз 2007-йисалай, зун композитор, ам шаир яз, яратмишунрин рекье санал кIвалахзава. Жемиятдин мярекатар санал тухвай йисара зун адан яратмишунрихъ галаз мукьувай таниш хьана, абуру зун лап вижеваз чпелди чIугуна ва чи тандем арадал атана. Чна Дербентда чи кьведан яратмишунрин чIехи концерт ганай… Санлай къачурла, за адан 50 шиирдиз музыка кхьенва. Аллагьди гайитIа, алай йисуз чаз а манияр нотаярни галаз кьве автордин кьилдин ктаб хьиз акъудиз кIанзава.
Шииратдин рекье къазанмишнавай агалкьунралди, таржумачивилин устадвилелди, эдебиятдин хиле кхьенвай кьван макъалайралди, алатай ва алай аямдин машгьур шаиррин яратмишунар ахтармишуналди, театрдин тарих ктабра туналди, Азиз Мирзебегова чи медениятдик чIехи пай кутунва.
Азиз Мирзебеговаз Дагъустандин халкьдин шаир лагьай тIвар гунин гьакъиндай машгьур журналист Абдулафис Исмаилова къарагъарнавай теклифдин тереф зани хуьзва. Ам и тIвар гуниз лайихлу я. За чи медениятдин, искусстводин векилриз, гьакI вилик-кьилик квай гьакимризни и теклифдин тереф хуьниз эвер гузва.
Къагьриман Ибрагьимов,
РД-дин искусствойрин лайихлу деятель,
РФ-дин журналистрин союздин член
