Школайра гатун лагерар ачухдалди вилик СтIал Сулейманан райондин Алкьвадрал аялрин воркаут-майдан цIийи хъувуна. Гила адан чил (покрытие) къулайдаказ туькIуьрнава, хатасузди хьанва. Месэла гьялиз куьмек гайиди Дагъустандин Халкьдин Собранидин депутат, «Сад тир Россия» партиядин член Имам Яралиев я.
Воркаут-майдан арадал гъанвай чкадин чил хатасузвал таъминардайди туширвиляй аялривай спортдал рикIивай машгъул жезвачир. Идакай меценатдиз Алкьвадрал фейи вахтунда, мектебда эвелимжи нубатда гьялна кIанзавай месэлайрикай хабар кьурла, чир хьана.
РикIел хкин, машгьур ватанэгьлиди тереф хуьналди, «Хуьрерин мулкар комплекснидаказ вилик фин» госпрограммадин сергьятра аваз, Алкьвадрин хуьре кьве мертебадин цIийи мектеб эцигнай. Виликдай меценатди вичин хсуси такьатрихъ ина – алим-просветитель Алкьвадар Гьасан эфендидин хайи маканда — музей эцигнай.
Чи мухбир
