Газетдин чинрилай гзафбуруз таниш тир, художественный гимнастикадал рикIивай машгъул жезвай Наира Нисредовади вичин агалкьунралди чун шадарун давамарзава. ИкI, са куьруь вахтунда ада жуьреба-жуьре 5 акъажунра иштиракна ва виринра 1-чкаяр кьуна. Кьилди къачуртIа, абурун арада июндин эвелра Кабардино-Балкариядин меркез Нальчикда СКФО-дин вири регионрай атанвай 350-далай виниз жаванрин арада кьиле фейи ачух турнирни ава…
Яшарин са шумуд категориядиз пай хьуналди кьиле фейи (Наиради лагьайтIа, 2018-йисуз дидедиз хьанвай аялрин арада вичин устадвал къалурна) и акъажунра судьяйри Н. Нисредовадин алакьунриз виниз тир къимет гана, тамашачийри ада къалурай нумрадиз гурлу капар яна.
Майдиз Наиради Москвада уьлкведин са кьадар регионрай жаванри художественный гимнастикадай чпин устадвал къалурай турнирда иштиракна. «А» категорияда (предмет гваз вичин устадвал къалурзавай жуьре) ам 1-чкадиз лайихлу хьана.
Къейд авун лазим я хьи, республикадилай къеце кьиле физвай акъажунра иштиракуналди, вичин устадвал къалурдай мумкинвал Наирадиз Дербентда («Кубок грации Дербента»), Каспийскда («Сокровища Дагестана»), («Горянка») турнирра инанмишвилелди къазанмишнавай агалкьунри, гьакI вичихъ и рекьяй бажарагъ, мадни виликди камар къачудай еке ашкъи авайди тестикьаруни ганвай.
РикIел хкин: Наирадин ери-бине СтIал Сулейманан райондин ЦIарахрин хуьряй я. Ам Дагъустанда Г.Н. Трошеван тIварунихъ галай кадетрин 1-корпусдин муаллим Насрудин Нисредован хизанда 2018-йисуз дидедиз хьана. ЦIи ада меркездин Б. Астемирован тIварунихъ галай 39-нумрадин лицейдин 1-класс акьалтIарнава. Н. Нисредовади лицейдин хордик кваз вичин алакьунар къалурзава, аялрин искусствойрин школада скрипка ягъиз чирзава. Ам художественный гимнастикадал машгъул жез 4 йис я.
Алай вахтунда ада «Ак-Барс» клубда тренер Ралина Кутламбетовадин гъилик вичин устадвал хкажзава. Наирадин гафарай малум жезвайвал, агалкьунри мадни гьевес кутазвай адаз вичин уьмуьр художественный гимнастикадихъ галаз алакъалу ийидай мурад ава.
Рагнеда Рамалданова
