И йикъара Махачкъалада, «Лотос» чапханада, 500 экземплярдин тираж аваз урус чIалал «Курахский район: по следам истории» тIвар алай ктаб чапдай акъатнава.
Ам, Алкьвадар Гьасанан тIварцIихъ галай медениятдинни марифатдин центрадин «Лезги хуьрер» проектдин сергьятра аваз, бинеяр Кьурагь райондин Цилингрин хуьряй тир Саругълан Ханвердиеван экуь къамат эбеди авунин ниятдалди адан веледрини хтулри акъуднава. Ктабдин редактордин везифаяр «Лезги газетдин» кьилин редактор Мегьамед Ибрагьимова кьилиз акъудна.
Ктабда Кьурагь райондин вири хуьрерин тарихдикай кхьенвай куьруь макъалаяр, шикилар ва кьилинди — гьар са хуьре 1886-йисуз кьиле тухвай хизанрин переписдин сиягьар (посемейные списки 1886 г.) гьатнава.
Абурун куьмекдалди гьар садавай, 1886-йисан сиягьра къалурнавай чпин чIехи бубайрилай гатIунна, къенин йикъал къведалди авай несилриз талукь тухумдин тарар (родовые древа) туькIуьриз жеда.
Ктабда гьакIни виликдай Кьурагь, гила Агъул райондик акатзавай 15 хуьруьн хизанрин переписдин сиягьарни ганва.
Хъсан еридин яцIу жилд алай, 751 чиникай ибарат и ктаб маса гузвай къимет 2000 манат я. Ам «Лезги газетдин» редакциядай маса къачуз жеда. Алакъадин нумра: 8-928-584-16-72.
Къейд ийин хьи, виликдай СтIал Сулейманан райондизни талукь гьа ихьтин къайдада гьазурнавай ктаб чапдай акъатнай. Адан автор Мурад Мегьамедкеримов я. Гьамни «Лезги газетдин» редакциядай маса гузва.
Агьмед Магьмудов
